Desde awe tardi, ora cu e compania nacional Fuels Marketing and Supply Aruba (FMSA) a test combustibel riba avionnan, a descubri un variacion den calidad. Esey a pone cu a opta pa controla tur e avionnan cu a “fuel” na Aruba awe. Departamento di Aviacion Civil a opta pa no core ningun risico y a wanta tur e avionnan na tera, te ora cu e problema ta soluciona.
Ta trata aki di 5 avion comercial y 1 priva. Entretanto a desvia dos diferente avion pa Corsou, cu tabata biniendo Aruba. Esey pa evita cu nan ta keda pega aki pa falta di combustibel.
“Aeropuerto no ta cera. Djis cu e avionnan cu a fuel no por sali y avionnan cu ta bin Aruba pa fuel, ta manda nan Corsou of Boneiro”, asina Hendrick Croes, Vocero di Aruba Airport Authority NV a indica un rato pasa. El a confirma cu a desvia dos avion so, un vuelo di Aruba Airlines y un otro di KLM for di Hulanda.
Ki ora ta keda cla cu e testnan no ta conoci ainda, pero entretanto e vuelonan cu mester sali di Aruba, di cual e avion a tuma combustibel na Aruba, ta keto bay na tera pa investigacion y prueba.
Tur avion ta plat na airport awor aki. FMSA a haya un variation ora nan a bai test nan fuel. Pa precaucion Directie Luchtvaart kier test tur avion cu a tuma fuel na Aruba prome nan sali. Esey ta causa retrazo. Mester saca afo cual avion a haya jetfuel cu no ta bon of ta contamina.
E vuelo di Avianca a yega Aruba normal. Pero, dor di e problema cu combustibel di FMSA, riba instruccion di DCA, a manda e avion Corsou pa “fuel”, pa despues e sigui pa Bogota, Colombia.
Mientrastanto for di Gobierno di Aruba a informa cu autoridadnan na Aeropuerto a notifica Gobierno di e problema cu jetfuel constata na Aeropuerto Reina Beatrix. Mesora a mobilisa y ta buscando e origen di e problema. Tambe ta buscando solucion pa e avionnan. Mayoria ya a haya solucion temporal pa bay fuel na Corsou. Prome Minister mr. Evelyn Wever-Croes ta informa y a pidi tur esunnan envolvi pa duna prioridad na e problema serio aki.
