Colombia ta pidi Cuba aresta e negociadornan di ELN

E presidente Colombiano, Ivan Duque, a pone presion riba Cuba diabierna, pa nan aresta 10 negociador di e Ehercito di Liberacion Nacional, despues cu su gobierno a atribui e grupo guerillero como autornan di e atake cu autobom contra di un academia di polis cu  provoca morto di 21 persona y a herida mucho mas.

Den un discurso televisa, Duque a bisa cu el a revoca e decreto cu a suspende e ordennan di aresto contra e lidernan di e grupo insurgente, kendenan a biba riba e isla di Caribe mientras nan wanta riba e speransa cu por reanuda e combersacionnan di paz.

“Pa henter Colombia awo ta cla, ELN no tin ningun boluntad genuino di paz,” Duque a bisa, haciendo mencion di un lista largo di secuesto y atakenan atribui na e guerilleronan desde cu e negociacionnan di paz a cuminsa na 2017.

“Nos ta gradici e solidaridad expresa pa e gobierno di Cuba riba e dia di ayera y awe. Nos ta pidi pa haci efectivo e captura di e teroristanan cu ta riba nan teritorio y entrega nan na autoridadnan policial Colombiano,” el a bisa, y a agrega cu no ta existi ningun ideologia ni causa cu ta hustifica e crueldad di e atake di diahuebs.

E comentarionan di Duque a tuma luga despues cu autoridadnan a afirma cu un experto den explosivo manco di ELN, tabata e persona cu a ehecuta e atake, den cual tabata esun mas mortal den e nacion Suramericano den 15 aña.

Aunke Jose Aldemar Rojas, no tabata tin antecedente penal, autoridadnan a bisa cu e homber di 56 aña, ta e mesun individuo cu ta aparece den informenan di inteligencia bao di e alias di Mocho Kiko, y cu ta kere cu el a perde e brasa, ora cu e tabata manipula cu explosivo durante un carera largo clandestino cu un cel di ELN cerca di e frontera cu Venezuela. El a muri den e atake di diahuebs.

E atentado a evoca algun di e incidentenan mas cruel di e pasado reciente Colombiano y a suscita interogantenan grave cerca di e menasanan di siguridad cu ta persisti tras di e acuerdo di paz di 2017 cu FARC.

Tambe parce di a marca e regreso di Duque den discurso riba e imperio di ley cu cual el a haci campaña pa e eleccionnan di aña pasa, pero cu a modera despues cu el a asumi cargo.