Colmo de los colmos: Guarda nos Costa a topa “trahado ilegal” den nan mesun cas!

7660

Ta parce cu Guarda nos Costa ta sali di un reto pa un otro. E departamento cu tabata resorta bou di Cuerpo Policial Aruba, despues bou di IASA, despues Migracion Aruba y awo directamente bou di Minister, ta topa sorpresa constantemente. Un razzia den propio cas e siman aki a topa cu un realidad sorpresivo, e compania doño di a containernan segunda mano eyden ta uzando trahadonan ilegal. Despues cu a controla algun, su mañan ningun hende a presenta mas na pia di trabou!

Minister mr. Andin Bikker a hay’e cu un berdadero batata cayente den e operacion diario di e departamento Guarda nos Costa. Awor cu e hefe, Trudy Hassell, ta cu vakantie, a nota cu varios asunto por bay otro. Un di e retonan ta e ampliacion di espacio pa detene esunnan indocumenta, cu no tin fin di keda cla tampoco. A hinca clausulanan den e contract, manera pago adelanta pa trabou, pero ni asina e compania no por caba di cumpli cu e acuerdo. Tur esaki mientras Guarda nos Costa ta sigui yen di detenidonan indocumenta, pendiente pa un dia Venezuela habri frontera pa por manda su ciudadanonan bek. 

Por corda ainda cu ora a puntra Minister con el a yega na e compania specifico aki, el a contesta di a haya conseho positivo di e hefe di Guarda nos Costa pa por traha cu e compania aki. Esey a causa pregunta, pasobra maneho normal di Gobierno ta cu DOW y DIP ta atende tur asunto di huur y tipo di acuerdonan asina. Ambos departamento, yena di ingeniero, arkitectonan y expertonan den construccion, a duna conseho negativo pa e contract aki. Pero e hefe di Guarda nos Costa, un polis, a bisa cu ta “OK” y consecuentemente ainda e compania no por caba di cumpli. No obstante cu e contract ta traha na beneficio di e compania. 

Mester menciona cu e tema aki a bin padilanti tambe durante e reunion cu e trahadonan. A splica e Minister di nan malcontento y di decisionnan descabeya cu ta tumando eyden, na desbentaha di e empleadonan. A splica e Minisyer “na placa chikito” con e operacion ta bay eyden, a lag’e mira con malo e containernan ta, con ineficiente pa traha eyden y e falta di material. Riba dje a cont’e cu nan ta bringa ilegalidad mientras cu “leiding” di Guarda nos Costa ta permiti un compania traha eyden cu trahado ilegal, como un berdadero falta di respet pa nan organisacion, nan trabou y pa e contract cu nan a haya den forma “dudoso”.

Den un situacion normal, un compania cu traha cu ilegal mester haya multa. Pero un compania cu ta traha cu ilegal na Guarda nos Costa, mester por perde e contract cu nan tin “per direct”.