Un grupo di CB 1 te klas Havo 3 tabata presente na Colegio Arubano San Nicolas. Desde diaranson anochi tur docente a haya tur informacion cu nan tabatin mester. Tur mentor tabata ricibi e gruponan, cual a parti nan den dos.
Robin-Ann Didder, miembro di Management Team Colegio San Nicolas, a splica cu un grupo a cuminsa 8:00 pa 9:00 di mainta y e otro grupo di 9:30 pa 10:30 di mainta. Tur mentor tabatin oportunidad pa conoce nan klas, specialmente esnan mas chikito. Nan a haya un opleiding y tur informacion pa loke ta nan rooster. Asina nan tin tur cos si bay 50-50 of 100%.
E scol ta contento cu nan a logra cu e muchanan por a yega scol bek, aunke e no ta 100%. E klasnan ta bon prepara y otro siman lo bay online. Drs. Samuel Dumfries, presidente di Management Team Colegio San Nicolas, a bisa cu docentenan ta bon prepara, aunke tin algun reto. Diabierna e muchanan di Havo 1, Havo 4 y Havo 5 tin di presenta na scol y ta parti den dos grupo. Esaki ta pa no tin aglomeracion, pero na mes momento pa haya nan rooster y plattegrond.
Colegio San Nicolas a bin cu un QR Code, di cual e muchanan cu nan celular por scan un bar. Esaki ta habri un pagina y nan informacion di studiante ta bay di biaha pa administratie. Muchanan ta yena un lista y despues ta verwerk esaki. Nan ta haci uzo di tecnologia cu ta existi caba.
