Colegio San Augustin ta bishita scolnan basico

Dialuna 22 y diamars 23 di februari algun docente di Colegio San Augustin a bishita diferente scol basico pa asina presenta nan scol na e alumnonan di e scolnan basico.

Di e manera aki e alumnonan por a conoce Colegio San Augustin un tiki mas di cerca. Nan a ricibi informacion di kico tur Colegio San Augustin tin pa ofrece nan como alumno y tambe kico tur ta haci como actividad na Colegio San Augustin. E alumnonan tabata contento pa scucha y wak videonan di e scol.

Nan a haya un bista mas concreto di entre otro; e infrastructura, e siguridad (camara y security guard), e klasnan ekipa cu materialnan moderno (tecnologia), e lesnan practico y experiencia comparti di algun alumno cu ta forma parti di e comunidad di Colegio San Augustin. Banda di esaki nan por a disfruta di e video unda ta mustra tur e actividadnan cu e scol ta organisa.

Na final di e informacion/presentacion nan a haya e oportunidad pa haci pregunta tocante cualkier inkietud cu nan por tabatin.

Durante di e bishita na e scolnan basico Colegio San Augustin a haci uzo di e oportunidad pa presenta nan revista cu tin como nomber: Kico tin na Colegio San Augustin. Den e revista aki tambe por lesa y mira tur loke ta pasa na e scol.