Colegio San Antonio: Alumnonan ta uza droga dor di problema social

Director di Colegio San Antonio, Gershwin Lee, a confirma awe cu nan tin un problema di uzo di droga na scol. Si el a aclaria cu no ta e a manda e informacion pa 24ora.com y e studiantenan humando marihuana den e bus cerca di scol, no ta su alumnonan. Pero, el a confirma na e medionan cu a compaña Parlamentarionan di MEP awe, cu SKOA ta na altura di e situacion y cu nan ta trahando pa preveni mas uzo di droga bou di alumnonan di e scol di nivel MAVO.

Den entrevista el a confirma cu ora nan test e alumnonan positivo pa droga, mayoria ta mustra di tin problema social. Sea nan tin rabia, tristesa of otro reto emocional cu nan no sa con atende cune. Hopi ta recuri e ora na huma marihuana.

https://m.facebook.com/story.php?story_fbid=2304956969758329&id=1504379713149396

E director di scol a sigura cu e no lo drenta e discusion cu si marihuana ta bon of no. Riba internet e muchanan ta mira “cosnan bon” so cu e droga ta causa pa salud. Scol sinembargo ta para riba cu alumnonan di e edad hoben asina mester abstene na uza droga. E motibo ta cu nan celebro ni a forma completamente ainda y cu marihuana ta stroba desaroyo normal di nan celebro.

Siman pasa ainda a tuma luga un reunion urgente cu diferente partner envolvi den e asunto. A notifica Minister di Enseñansa, Minister di Husticia, SKOA, Polis y varios otro instancia mas. Punto di alumnonan ta bayendo atras y mester tuma accion urgente!

Mescos cu den diferente otro caso ultimamente, tur cos ta keda scondi te ora 24ora.com publik’e. Probablente awo si Colegio San Antonio lo haya e oido necesario. Por ehempel awe mesora Parlamentarionan a bay bishita e scol pa pone nan mes na altura di e situacion.

Ta ironico cu Ministerio di Enseñansa a pobe un suma cuantioso e aña aki atrobe pa organisa un conferencia pa mustra con “bon” marihuana ta pa salud di hende. Di otro banda scolnan ta bati alarma cu probablemente e mesun promocion aki ta mandando un mensahe robes na comunidad y na studiantenan. Ata nos awo cu e cuenta presenta!