Diabierna net algo prome cu mey anochi a sosode un caso hopi serio na Noord. Polis a bay dilanti Lekker pa un pelea. Ora cu a yega na e sitio a resulta cu e hendenan ta den un cas dilanti Lekker Bar. A papia cu un homber cu a conta cu e tabata tin problema cu colega. Parce nan tabata bebe y a haya problema cu otro.
E problema a caba na pelea. Den e proceso dos di nan kier a cende e otro colega na candela. A tira gasolin riba dje pero no a logra cende na candela. Un acto asina ta wordo considera intento di asesinato. E victima a keda cu poco sla na curpa. Polisnan di Noord a avisa recherche.
Dos detencion a cay tambe e momento ey. Cuerpo Tecnico a presenta y tuma detayenan di e sucedido. Despues Polis a hiba e victima Hospital pa asina dokternan atende cune riba e golpinan y daño na su curpa cometi pa su propio colega cu a bringa cune y kier e cende na candela.
