Coca Cola y Powerade ta e orguyoso sponsernan di Copa Paisnan di Reino, un torneo di futbol veterano, cu ta tuma luga e fin di siman aki na Aruba. Apertura ta tuma luga pa 6’or di atardi.
E bon conoci personahe den mundo di deporte Roy Helder ta forma parti di e comision organisado, kende a splica cu ta trata di un grupo di amantenan di deporte, cu awo ta hunga of dedica nan mes na futbol veterano, cu a dicidi algun aña atras organisa un evento den cual team di e diferente islanan Hulandes ta participa.
E team cu ta participa ta esun cu gana e campeonato di 35+ di e islanan Boneiro, Corsou y Aruba. Pa haci e torneo mas atractivo, ta pone un di cuatro team. E pais organisado tin derecho pa pone e team aki. E mester ta den clasificacion di e prome cuatronan na su pais. E teamnan participante ta Sithoc di Corsou, La Fama di Boneiro, Inter RCA di Aruba y Caravel.
E torneo ta tuma luga durante tres dia y den e schedule traha, tur e teamnan lo topa otro, cuminsando e wega inaugural unda La Fama Boneiro ta enfrenta Caravel y anochi ta Sitho Corsou vs Inter RCA di Aruba. E final lo ta diadomingo. E campeon di e Copa aki ta bay hunga dia 27 di april, 2020 den Weganan di Reino.
Tur e weganan ta tuma na veld di Yara. Helder a pidi tur amanten di futbol pa bin apoya e teamnan veterano cu ta enfrenta otro.
