Den pueblo e gritonan ta birando mas y mas fuerte ora cu di cada skina ta sali mas cobransa cu nan mester paga. Si no ta aumento di BBO, BAZV, BAVP etc, ta Crisis Heffing, Aumento drastico na Grond Belasting pa genera extra 14.5 miyon den caha di gobierno, aumento riba Accijns di Alcohol y Tabaco, aumento riba Gasolin etc. Esey ta gobierno so. E mesun gobierno aki a campaña tambe riba School Geld. Luigi Bergen di MEP awe ta den Cocolishi ganando salario mas 25%.
Ademas e ta den mas cu un hunta di comisario cu tambe ta paga algun mil florin pa luna sea traha of no traha. Esaki ta Luigi Bergen cu tabata saca e muchanan na EPI pa bin protesta contra pago di School Geld. El a campaña cu borchinan grandi cu MEP lo elimina School Geld. Awe tur cos tabata mas bien un mentira di Luigi Bergen. Mientrastanto banda di e medidanan di gobierno, awe scolnan ta dunando carta na e muchanan pa hiba cas pa mayornan. Un di e scolnan na Santa Cruz a pone den nan carta cu ta cabando aña escolar 2018-2019 den algun siman. Cosnan masha nechi den introduccion y djey a notifica mayornan cu no a paga aña pasa, cu nan no por inscribi nan yiunan na scol pa aña escolar nobo.
E sistema di computer lo no acepta e inscripcion pasobra esun bieu ainda ta habri. Ademas esun cu no a paga nifica cu nan yiu ta keda afo di e bus trip cu fiesta fin di aña. Aki ta separa e muchanan treciendo un division cerca muchanan inocente cu no sa kico ta pasando. Esaki no ta forma di atende. Tin mayornan cu echt no por paga. Pa caba di corona e situacion, den e mesun carta cu e scol na Santa Cruz a manda pa mayornan, ta poni tambe cu awor nan a haya airco. Esey kiermen cu pa cada yiu entrante aña escolar 2019-2020 nan mester bay paga 150 Florin. Kiermen un mama cu dos yiu mester paga 300 florin y otro cu tres yiu mester paga 450 Florin. Esaki por ehempel ta un medida scondi cu awor mayornan no a spera despues di tanto medida di gobierno. Bo ta drumi anochi y mainta ta lanta cu otro medida sorpresa.
Pa colmo cobransanan di scol cu esnan den gobernacion a bisa pa no paga den pasado. Hasta tabata tin casonan den corte. Awe esnan cu a bisa no paga ta den gobierno y a lubida riba e grutonan pa no paga School Geld. Splica cual mayor por paga School Geld y riba dje extra 150 Florin di Airco pa cada yiu. E medidanan scondi asina ta mas bien cabando cu e pueblo cu no sa mas kico pa haci pa por paga su debenan.
