Awe mainta pa mas o menos 9:20am Wardacosta di Caribe Hulandes staciona na Aruba a controla un boto di Island Watersport na altura di Eagle Beach. Capitan di e boto a presenta tur su documentonan, pero faltando e prueba cu e boto ta “gekeur”. Esey e no tin debi cu Directie Scheepvaart sea no tabata trahando of ta traha orarionan limita pa mo,tibo di Covid-19. Asina mes, Wardacosta a oblig’e saca su boto comercial for di lama, pasobra legalmente e boto no por ta riba awa.
E comerciante Tony Waldron, cu mescos cu hopi otro, a pasa 4 luna sin negoshi debi na ceramento di frontera pa turismo, ta haya su mes awor cu controlnan estricto cu de facto, ta caba cu su negoshi. Den un declaracion na 24ora.com, el a expesa su disgusto y un sentido di cu Bo mannan ta mara y sin cu por haci nada contra un sistema di empleadonan publico cu ta tranca nos economia y ta stroba comercio pa por funciona optimalmente.
Island Watersport a bisa awe mainta den entrevista cu 24ora.com, cu e departamento cu ta controla botonan no a presenta riba e fecha di nan afspraak pa controla e boto, pa motibo di e crisis di Covid-19. Como tal, e botonan no por a keur, aunke cu e por a demostra e personal di Wardacosta cu e tin tur documento na ordo. Asina mes nan a inform’e cu asina no por y cu e mester saca e boto for di lama pa falta di e papel di keuring.
Island Watersport ta sinti cu di e forma aki, e mesun Gobierno cu ta pidi comercio pa yuda reactiva nos economia, di otro banda ta stanca nos economia dor di tin empleadonan publico cu no ta haci nan trabou y mas bien ta haci tur lo posibel pa stroba operacion normal di comercio. A sigura cu nan botonan tin tur nan permisonan actualisa, manera semper, pero awoe pa via di Directie Scheepvaart nan no por opera riba lama, cu tur consecuencia pa e tatanan di famia cu ta gana nan pan di cada dia ofreciendo tur acuatico na turistanan.
