Cu un mayoria limita di solamente 11 voto (9 MEP y 2 RAIZ) na fabor y 4 den contra, awor rato ey pa 12:20 am a aproba Presupuesto Supletorio 2022. Mientras cu coalicion tabata presente den su totalidad, AVP a briya cu nan ausencia. Accion 21 y MAS tabata completo mientras cu AVP a conta cu solamente 1 di e 7 miembronan presente den sala pa votacion. Tur tres fraccion den oposicion a vota contra e presupuesto.
Mester menciona si, cu den e presupuesto aki, den cual ta dispone di cifranan mas real y concreto, a demostra un reduccion enorme den gasto y aumento den entrada. A baha e deficit financiero for di 227 miyon florin pa apenas 92 miyon florin. Esey riba su mes ta un logro di aplaudi. Mayoria biaha, den pasado, gobiernonan den Presupuesto Supletorio ta pidi pa mas placa, en bes di baha gasto. Gobiernonan tabata custuma di altera nan entrada y yegando fin di aña, ta constata cu nan cifranan tabata mucho halto y desconecta for di realidad. Den e caso aki ta lo contrario, tabatin hopi “mee vallers”.
MEP a bisa cu e cifranan den Presupuesto Supletorio no ta bin di sorpresa. Setty Christiaans a enfatisa cu MEP semper ta uza cifra conservatorio. Nunca ta uza e “best case scenario” y esey a resulta den cifranan mas alentador awor. Ta haya e logro aki motibo pa celebra, confirmando un maneho serio.
Pa por a yega na esey, Gabinete Wever-Croes II a baha e cantidad di empleado publico cu riba 300 trahado menos. A corta den gasto di operacion di e aparato gubernamenal y a logra aumenta entrada na impuesto.
Prome Minister a anuncia cu pensionadonan lo cobra nan “gelijk bedrag” competo e luna aki. Esaki despues cu nan tin dos aña ta cobra solamente mita di e suma acorda. Di otro banda a anuncia aumento di salario minimo pa otro aña y aumento di pensioen di biehes. Lo reduci impuesto riba entrada y salario, pa baha e presion riba entrada di pueblo.
Di otro banda, lo aumenta BBO di 6 pa 7% entrante dia 1 di januari 2023. Lo introduci un impuesto riba turismo di $15 pa cada turista adulto cu yega Aruba. Desde juni 2023 lo cobra BBO na frontera ora di importacion. E locual ta yama BBO mas bien lo bira un “Hybrid BTW”. Cu e diferencia cu door cu a opta pa implementa e BTW mita-mita cu BBO, cu e no ta duna mesun beneficionan cu BTW ta brinda den cual e no ta cumulativo, pues ta pag’e un solo bes.
E nivel di e reunion sinembargo no ta gana un premio. E poco parlamentarionan cu a opta pa aumenta e reunion a haya un bon lastra di e ministernan. Prome Minister a reta cada un di nan, mencionando nan nomber pa reta un “persoonlijke feit”, den cual el a purba di tur forma pa provoca e opositor politico pa duna nan opinion riba e caso di Benny Sevinger. Como cu ningun no kier a sigui su peticion, el a subraya di no tin respet pa niun mas y cu e no kier tende nan cuestion’e tampoco riba e investigacion na Arubahuis. El a compara bisando cu e investigacion Avestruz ta penal, Benny Sevinger ta un acusado. Den caso di Arubahuis, tin un investigacion administrativo.
Esun cu a tribi di haci pregunta mucho skerpi, manera Miguel Mansur, a haya e apodo di “shishi” for di e propio minister-president, alabes lider di MEP. Ayera e tabata hopi fuerte contra oposicion y no a scapa niun di atakenan politico pisa. Den esey a yega te na politico defunto, manera Watty Vos, cu a muri 21 aña pasa caba. Ainda ta repasa un supuesto KB cu Henny Eman lo a pidi p’e den añanan 90.
Y sin duda, e liña cora cu a core den henter e reunion tabata e caso Avestruz y Benny Sevinger. Coalicion ta bibando duro riba e axusacion di fiscal contra e acusado/parlamentario. Ora a bisa minister-president cu no por condena Sevinger ainda prome cu hues anuncia su veredicto, el a contesta cu si 1% di loke fiscal a constata ta berdad, cu esey mes ta suficiente pa cataloga e ex-minister como un sinberguensa
Partinan chistoso den e reunion sigur tabata ora Mansur a declara cu e tin un amor special pa Minister Maduro. El a bisa cu e nunca a yam’e ignorante sino un haragan! Di otro banda hopi a hari y otronan critica ora Mervin Wyatt a reclama cu un hende, sea un colega of un minister a come su cuminda. Esey riba su mes no a zona na un nivel desea den e organo mas halto di nos pais. Anto pio cu e presidente a bisa di lo investiga tambe cua parlamentario of minister a come dos cuminda eyden.
Cu aprobacion di e Presupuesto Supletorio tra’i lomba, awe lo trata final di e reunion publico di Presupuesto 2023. Den e presupuesto ey ta anticipa un surplus di 1%. Esey ta facil riba papel, pero cu mester ehecuta tur e cambio y reformanan pa por logra. No ta imposibel, pero lo rekeri curashi y wes’i lomba politico. Tur cos ta mustra cu e presupuesto lo pasa sin problema y bon na tempo.
