Awe nochi un mayoria limita di 11 voto na fabor den Parlamento a aproba e ley nobo di LAFT, incluyendo e amienda presenta pa MEP, POR y RED cu ta kita e autoridad di Conseho di Minister di Reino Hulandes y ta pasa e autoridad na Parlamento di Aruba. E pregunta ta si Gobierno di Hulanda lo acepta e cambio di ley por medio di e amienda, siendo cu Gabinete Wever-Croes a acorda cu Gobierno di Hulanda caba via un protocol, riba con e ley nobo lo mester ta.
Mester menciona cu e Fraccion di AVP a vota contra mientras cu coalicion tabata na 11 asiento so, dor di enfermedad di Marisol Lopez, cu a impedi su participacion awe na e reunion importante aki.
Criticonan ta insisti, cu si Conseho di Minister acorda un decision cu Hulanda y awor nan mesun Parlamento ta pasa un amienda pa cambia henter e tono di e acuerdo cera, cu esaki ta mandando un mensahe di “brevet van onvermogen” pa Gabinete Wever-Croes.
Lo mester spera riba con Gobierno di Hulanda lo acepta e strategia politico aki di Oranjestad contra Den Haag, pasobra e mesun lider politico cu ta bisa Hulanda “si” di un banda, ta permiti su mesun partido y coleganan den Parlamento bisa “no”. Di e forma ey no por bisa cu ta el a bisa “no” pero cu ta Parlamento cu ta traha “separa” for di Parlamento.
