Curaçao Medical Center ta risibí e promé grupo di médiko merikano ku a sali karantena ayera, despues di a sigui protokòl estrikto di GGD pa 2 siman. Pues awe mainta CMC a duna un kaluroso bon biní na e tím di 39 profeshonal médiko ku lo asistí CMC den e próksimo lunanan.
E intenshon di e tím ta pa duna asistensia den kaso di un brote di COVID-19 pa asina CMC por sigui duna kuido médiko mas normal ku ta posibel na komunidat di Kòrsou. Mientrastantu, e médikonan merikano lo sera konosí ku CMC i su prosesonan i lo asistí den varios departamentu a base di na ekspertisio manera Emergensia, Kuido Intensivo Neonatal, Ginekologia i ku mayoria dediká na Kuido Intensivo.
E grupo ku ta konsistí di speshalistanan, paramédikonan i enfermeronan lo akudí na CMC djaluna te ku djabièrne. Ku tur 6 sala di operashon 100% den funshon i ku yegada di tur material i ekípo nesesario for di algun siman pasá, CMC ta sigui enfoká riba bahamentu di e lista di espera di pashènt mientras ta mantené nivel di kuido haltu.
