CMC ku mas teknologia avansá pa tratamentu di kanser

157

Ayera ta un dia históriko pa Curaçao Medical Center (CMC) pa loke ta tratamentu inovativo di kanser. E fuente radioaktivo di dósis mas haltu ku e islanan den Reino Hulandes a yega di trata kanser kuné, a yega Kòrsou.

CMC a sigui protokòl internashonal pa por a transportá e material sumamente delikado akí di Aeropuerto Internashonal di Kòrsou pa CMC. E terminologia ofisial di e terapia ku lo hasi uso di e material radioaktivo yama Brachyterapia i ta un tipo di radioterapia interno. Kontrali na radioterapia eksterno, kaminda ku e fuente di emishon di rayo X ta pafó di e kurpa i ta dirigí rayo pa un ária spesíifiko den e kurpa, ku brachyterapia e fuente di emishon di rayo ta drenta den e kurpa, serka di òf den e tumor.

Ku e teknologia moderno akí e pashènt ta risibí un dósis haltu den parti interno di su kurpa pa trata un ária mas chikí den ménos tempu. E tratamentu akí ta ofresé vários benefísio, entre otro ménos tempu den tratamentu i ménos riesgo pa okashoná efektonan sekundario pa e pashènt. E tratamentu ta bai den 3 pa 5 biaha pa mas o ménos 20 minüt i ta redusí riesgo pa motibu ku ta eksponé e pashènt na ménos radiashon. Por trata vários tipo di kanser ku e material i teknologia akí. Por ehèmpel: matris, boka di matris, kueru, prostat, etcetera. CMC ke gradisí GMN, Duana, Kuerpo di Bombero, Kuerpo Polisial i e tim médiko i físiko di Departamento di Radioterapia pa nan dedikashon i profeshonalismo den e transporte di e material. Nos ta sigui avansá riba tereno médiko i di tratamentu di nos pashèntnan.