Clyde Harms: Reaccion na Sr. Wolff su defensa di e dictador Nicolas Maduro

Mi a keda hopi desapunta cu Sr. Wolff, un ex-sindicalista cu mester tin bienestar di trahadornan na pecho, a dedica asina tanto esfuerzo pa defende cu pasion e tirania di Nicolas Maduro den algun medio di comunicacion local.

En bes di uza e plataforma di prensa pa lucha na fabor di e pober Venezolanonan cu ta sufriendo asina tanto, Sr. Wolff ta scupi gal contra Merca pa defende e dictadura cu ta oprimi e pueblo Venezolano cruelmente, un dictadura cu a devasta economia di Venezuela cu un hyperinflacion cu a pone e pais number uno riba e “Misery Index” di Steve Hanke, un economista renombra di Johns Hopkins University.

E “Misery Index” ta un ranking di paisnan uzando parametronan economico y social. E score di Venezuela ta seis biaha e score di e pais cu ta rank number dos!  Bou di dictadura di Maduro mas di 80% di Venezolanonan ta biba den pobreza miserabel, mas di 15% di Venezolanonan mester mata nan hamber comiendo desperdicio den cayanan. Ki otro bo por spera di un pais cu un inflacion cu na 2018 a surpasa 80,000%!!! Siman pasa mi suegra a keda den shock ora cu e mester a paga ekivalente di un luna di sueldo pa un galiña fresco. Si no tabata pa e contribucion di su yiu cu ta biba na Aruba, e lo no por a cumpr’e. Y asina miyones di Venezolano ta depende riba nan famia y amigonan den exterior pa nan por sobrebiba.

Na hospitalnan e indice di scarsedad a surpasa 90%. Es decir, di cada 100 cos cu un hospital mester na cualkier momento, tin menos di dies. Ora un pacient mester opera e mester busca tur verband, remedi, y otro insumonan, hasta antibiotica, cu e ta bay tin mester durante y despues di e operacion. Si e mester di inyeccion, e mes mester trese e hanguanan tambe. Dekel, laken di cama, cusinchi y slopi, e pacient mes mester trese tur. E no ta haya cuminda di hospital asina ta cu su famia mester hiba desayuno, almuerzo y cena p’e tur dia. Esaki ta e situacion berdadero na e pais cu un tempo tabatin e miho servicio medico di Suramerica, danki na e dictadura cu Sr. Wolff ta defende apasionadamente.

Caminda cu un tempo hendenan ta bay trabou den bus of taxi, awor nan mester prop nan mes abordo di trucknan habri pa yega di un lugar pa otro y paga como shen bes mas cu nan tabata paga. Taxinan y busnan a desaparece pa scarsedad di repuesto. Hopi auto priva ta den garage pa e mes un rason. Te hasta gasolin y diesel a bira scars y autonan mester bay di un stacion di servicio pa otro pa haya combustibel.

Organizacionnan caritativo internacional ta calcula cu awe tin mas di 300 mil pacient cu lo muri pa falta di remedinan cu nan mester. Ami mes cu mi señora mester a manda remedinan pa controla sucu, presion di sanger, dolornan di artritis, y varios otro pa famia y amigonan. Tur dia e boticanan na Aruba ta yena un cantidad di prescripcion di dokternan na Venezuela pasobra aya e remedi no ta disponibel.

Reaccionando na peticionnan di President Guaydó, Merca a manda un cargamento di mas di nuebe  truck di carga cu ayudo humantario pa un pueblo Colombiano cu ta na frontera di Venezuela. A pidi di forsanan militar pa permiti e trucknan drenta Venezuela, pero en bes di un permiso, e regimen cruel di Maduro a laga blokia tur e canalnan di e brug cu dos container grandi y un tank-truck di transporta gasolin. Mas cruel bo no por ta! Ayudo humanitario cu por ta salbabida di miles di Venezolano ta wordo stroba di drenta e pais. Mi ta puntra Sr. Wolff si e ta di acuerdo cu e paso aki di su heroenan di Miraflores.

Sr. Wolff ta insisti cu Maduro ta e president legitimo cu a wordo eligi cu mayoritario di voto den e eleccion di mey 2018. Casi henter mundo a repudia e eleccion aki como fraudulente e mesun dia cu ela tuma luga. Prome cu eleccion, Maduro a laga deshabilita candidatonan fuerte y a delanta e fecha di eleccion  pa oposicion no haya tempo pa campaña. No, Sr. Wolff, cu tur mi respet pa abo como sindicalista Arubano, bo ta ekiboca. Maduro no ta e president legitimo di Venezuela y ta p’esey casi henter mundo ta exigi un eleccion nobo.

Comments

comments