Clyde Harms: Na luga di tira culpa pa situacion di Caya Grandi ban busca solucion

Por ta cu bista riba eleccion e aña aki, recientemente un corant local a bolbe culpa gobierno pa e ceramento di negoshinan den caya grandi, pasobra “nan a trece e tram.” No ta pa defende gobierno, pero mi ta kere cu mester busca e culpa otro caminda. Y na luga di tira culpa, gobierno mester busca un e remedi pa e malesa economico den e parti aki di Caya Betico Croes.

Cuater aña pasa mi a skirbi cu CNN-Money a publica un articulo cu ta conta cuanto negoshi a cera y ta bay cera na Merca y na Canada. Ascena Retail Group, doño di e.o. Ann Taylor y Lane Bryant cu ta tiendanan di fama mundial, a anuncia cu nan ta bay cera 250 tienda na 2017 y si nan no logra haya reduccion di huur, nan lo cera 400 tienda mas. No ta culpa di tram.

Mall bashi ta un realidad na Merca y Canada. Segun Credit Suisse, na aña 2022 25 % di tur mall na Merca y Canada lo cera. Tiendanan manera Macy’s, Saks Fifth Avenue, J C Penney y Sears cu considera tiendanan “anker” di mall grandi ta pasando den turbulencia economico y ora nan cera, e mallnan caminda nan ta localisa ta cuminsa muri. Durante 2018 y 2019 tabatin un crecemento grandi di negoshinan cu a bati bankroet y mas di 15 mil tienda a cera.

E cifranan aki no ta exageracion. Macy’s mes a anuncia cu na 2017 nan a cera por lo menos 68 tienda. Saks Fifth Avenue y Lord & Taylor no a specifica cuanto tienda nan a cera, pero nan a declara cu e aña ey nan a elimina mas di 2000 empleo. J C Penney’s a cera 138 tienda. GameStop a elimina mas di 100 tienda. K-Mart y Sears a cera 150 di nan tienda na 2017. Ta miles di tienda mas chikito ta pasa den e mes tormenta economico.

Kico ta causante di tur e ceramentonan aki? Naturalmente no ta tram. E criticonan di e tram den caya grandi ta insisti cu e tram ta stroba e autonan trece e cliente te dilanti di e tienda. Na e mallnan cu a cera, autonan por a core te na entrada di mall. Hopi experto ta punta dede riba Amazon y e cumpramento online, argumento hopi fuerte.

Talbes na Aruba nos mester wak loke ta pasando na Merca y ahusta nos mes na e realidadnan nobo di bida. Di Aruba tambe nos po haci uzo di e servicio di Amazon. Di Aruba tambe nos por haci pedida online. Tal bes e doño di e edificionan ta cobrando huur. En bes di e splicacion simplistico, “ta tram”, nos mester analisa otro factornan y mira con ta haya hende bolbe disfruta di loke center di Oranjestad ta ofrece y lo por ofrece.

Na Ljubljana, Slovenia, gobierno a cera casi tur caya den center di stad pa trafico di auto y truck, y comercio a florece. Kico nan a haci? Ki cambio nos mester trece, ki ambiente nos mester crea, pa haya hendenan bolbe keiro den caya grandi? Ta tempo pa nos cuminsa “think outside the box”.

“Mi tin entendi cu Randall Croes a presenta un plan na gobierno. Mi no conoce e plan, pero como e ta bin di un economista Arubiano cu un trayectoria exitoso.” E merece consideracion serio. Ta di spera cu gobierno lo busca conseho di expertonan pa evalua e plan y public’e pa pueblo tambe por duna su opinion. “Huntu nos por logra hopi.”