Clyde Harms: Aruba Symphony Festival and Academy danki, Simon Gollo , pa scoge Aruba

Print

Despues di presenta e Festival pa 12 aña na su ciudad natal Maracaibo, Simon Gollo mester a bandona Venezuela y el a cuminsa busca un otro pais, preferiblemente cerca di cas, caminda e lo por sigui su soño. Un soño cu e tabatin desde cu e tabata studia musica na Alemania y Suisa. Na edad di apenas 20 aña, ora cu mayoria di futuro musiconan ainda ta luchando na conservatorio, e prodigio di Venezuela a bolbe na su Maracaibo stima, y huntu cu su famia a crea Nuevo Mundo Festival y Academia.

E amor di Simon pa Aruba ta bay bek casi 15 aña. Mi a haci conoci cu Simon despues di e ultimo concierto di e Fesival na augustus 2005. Ora cu el a tende cu ami ta Presidente di Aruba Scholarship Foundation, Simon spontaneamente a ofrece pa bay Aruba y duna un concierto pa recauda fondo, gratuitamente! Huntu cu Abram Abreu, un musico di Caracas hopi conoci como pianista y tocador di harpsichordia, Simon a actua den Cas di Cultura casi “sold-out” na januari 2006. E anochi ey, Simon Gollo su concierto a recauda casi 25 mil florin cu Aruba Scholarship Foundation a uza pa paga e educacion e siguiente semester pa tres studiante Arubiano na un universidad na Merca.

Simon Gollo a bolbe mustra su amor pa Aruba tempo cu Armand Simon a crea Aruba Piano Festival. Cu su conexionnan cu musiconan tur parti di mundo, e tabata clave pa haya musiconan di caliber pa participa. E Festival tabata tene un competencia di e studiantenan y e ganador tabata ricibi un beca pa bay participa den e “Masterclasses” di Nuevo Mundo Festival y Academia na Maracaibo. Simon no tabata cobra e becadonan di Aruba y nan tabata keda na cas di famia di Simon, sin paga nada. Ivan Kock y Lisa Partodikromo ta dos cu mi ta corda awor.

En realidad, no tabata un sorpresa cu Simon a scoge Aruba pa sigui su soño. Di su parti, Aruba Symphony Festival ta purba envolve Arubianonan y musica Arubiano den su eventonan. Aña pasa e Festival a presenta e dos canticanan Arubiano mas stima, “Aruna Dushi Tera”, “Abo so” y otro canticanan di compositornan Arubiano, canta pa e dos miho coronan di Aruba, “Ars Nova” y “Cantare” dirigi pa Mayra Kock – Garrido, compaña pa icononan di e mundo musical Arubiano, Ryan Maduro y Edwin Kock, entre otro. Den pasado, Festival a duna beca na un pianista y un trombonista Arubiano, y nan a laga sa riba medionan social cu mas beca ta disponibel pa musiconan Arubiano e aña aki.

E di cinco edicion di Aruba Symphony Festival lo inaugura juli 17 cu participacion di mas di 20 Arubiano: Tica Giel lo dirigi y canta cu e coro di mucha di Sta Anaschool di Noord y e coro femenino “Den Harmonia”, compaña pa e pianista renombra Johnny Scharbaay. Di juli 17 te cu juli 27, Aruba lo por disfruta di conciertonan pa mas di 100 musico: maestronan di caliber mundial y studiantenan di musica na nivel di conservatorio. Como parti di e programa academico, e Festival tambe lo presenta un lectura di e internacionalmente famoso Dr. Benjamin Zander, director di e Boston Philharmonic Orchestra. E lectura ta e mundialmente aclama “The Art of Possibilities”. Esaki ta otro evento cu abo no por perde!

Simon Gollo ta e fundador y Presidente di e “stichting” Nuevo Mundo Foundation cu ta organiza y presenta Aruba Symphony Festival and Academy, di cual e ta Director Artistico tambe. E ta su curazon, alma y curpa.

Durante e ultimo 12 lunanan Simon Gollo a duna mas di 30 concierto na decenas di pais, como violinista y como director di orkesta. Otro siman, como violinista di e “Q-arte String Quartet” di Bogotá, e lo cuminsa un tour di tres pais Europeo: Republica Czecho, Alemania y Austria. Despues di e Aruba Symphony Festival, Simon tin compromiso pa duna les y dirigi orkesta na algun ciudad di Brazil. Pa otro aña ya Simon tin invitacion pa bay dirigi orkesta na Vietnam.
Biahando for di Houston pa Bogota, awe nochi Simon lo yega Aruba pa algun dia pa conferencia cu e directiva local di e Fundacion y pa yuda recauda fondo pa e Festival.

Cultura y Educacion, huntu cu Famia, ta forma weso di lomba di comunidad Arubiano. Gobierno di Aruba a abraza e concepto di LeerOrkest cu “un educacion sin musica no ta educacion”, y awor ta prepara pa trece musica den curiculo di e scolnan basico. Segun e filosofo/educador Emil Friedman, cultura sin musica no ta cultura. Aruba Symphony Festival ta e expresion mas fuerte di nos cultura musical y nos mester sostene e Festival y nos mester ta gradeci na Simon Gollo pa su decision di presenta e festival aki, riba nos isla. Y pasobra e musiconan ta bin di asina tanto diferente pais, Aruba Symphony Festival, mescos cu Tanglewood y Aspen, tambe a bira un plataforma fuerte pa publicidad pa Aruba como destinacion turistico.

Mientras cu Simon Gollo ta na Aruba (te dia 31), nos gobierno y sector priva lo tin un oportunidad bunita pa lag’e sa cuanto nos ta aprecia loke e ta haci pa nos isla. Como Arubiano y como miembro honorario di e Festival, mi ta urgi tur Arubiano pa duna sosten na e Festival pa asina e por keda semper ARUBA Symphony Festival. Contacta mi na [email protected] si bo kier sa con bo por yuda.

Actualmente, Simon Gollo ta Assistant Violin Professor na New Mexico State University y Director di e Philharmonic Orchestra di NMSU.