Club di Gimnasia Avanse ta e prome club pa duna gimnasia na atletanan femenino, masculino y muchanan for di 4 aña di edad.
Club Avanse ta existi e aña aki pa 35 aña y pa celebra e hecho aki ta organisando un competencia internacional di gimnasia ritmico. Hopi hende conoce gimnasia artistico, cual semper nos por mira na television.
Pero gimnasia ritmico tambe ta un deporte hopi bunita cu ta bay introduci na Aruba. Ya caba ta duna les den gimnasia ritmico pa varios aña. Pa culmina e 35 añanan di Club Avanse, Federacion Gimnastico Arubano tambe cu su ayudo, a logra forma e competencia aki.
Milly Bagueri, presidente di Federacion Gimnastico Arubano y tambe miembro di Club Gimnastico Avanse, a comenta cu hunto a logra trece e aña aki, e presidente di federacion internacional di gimnasia cu a yuda Avanse pa por logra organisa e competencia aki y un tayer tambe.
Prome biaha na Aruba
E aña aki lo bay tin e prome competencia internacional di gimnasia ritmico na Aruba y tin dos invitado special cu ta un bicampeon Olimpico, Eugenia Kanaeba di Rusia. Tambe tin bicampeon for di Hapon, Usumi Kawasaki y tambe seis pais invita, cualnan ta Mexico, Colombia, Canada, Merca, Republica Dominicana y Costa Rica.
Adriana Sebilla, rythmic gymnastic coach na Aruba, a splica cu tin un total di 70 participante y ta spera pa full Aruba bin apoya e muchanan den e competencia aki.
Un evento grandi
Miguel Arrebola Ortiz, representante di mercadeo y evento pa Avanse y tambe miembro di e comite di Federacion Gimnastico Arubano, a comenta cu esaki ta prome biaha cu ta haci un evento asina grandi.
A dura hopi tempo pa organis’e. E prome biaha a haya bishita di e presidente di e Federacion Internacional di Gimnasia, a bin Aruba y a gust’e asina hopi cu na final, a dicidi hunto cu e Federacion di Gimnastico Arubano pa haci hunto un evento colaborativo.
Ta bay tin cuater dia di actividad. Ta bay tin dia 16, 17, 18 y 19 di december, cu dia 16 ta bay ta e ceremonia parti atardi. Parti mainta ta bay tin e masterclass di e dos atletanan cu ta bay bin Aruba.
Dia 17 ta bay tin competencia mes di Gimnasia Ritmico, cual ta bay di 1’or di merdia pa 6’or di atardi.
Dia 18 di december ta bay tin e masterclass un biaha mas y dia 19 ta bay tin e gala gimnastica, cual ta forma parti di e Federacion tambe.
E ta un invitacion pa tur e clubnan di gimnasia di Aruba pa forma parti di dje. E tema di e aña aki ta bay ta Disney. Cada club di gimnasia di Aruba por disfrasa nan atleta den trahenan di Disney pa por participa den e competencia.
Durante e competencia ta bay tin cuminda, bebida y naturalmente shownan. Ta bay tin diferente actividad pa asina ilustra un tiki mas kico ta gimnasia ritmico na Aruba.
Artistica ya ta un deporte cu ta wordo mira hopi na Aruba. E diferencia entre ritmico y artistico hopi hende na Aruba no sa hopi di dje. Cu e competencia aki lo ta bay ta hopi interesante pa esnan cu lo bay t’ey presente.
Ta invita publico y Aruba completo pa bin presencia e evento aki. E ta bay ta un competencia sumamente importante pa Aruba, e Federacion y pa Club Avanse, pa motibo di e presencia di Eugenia Kanaeba, cu ta un bi-campeon Olimpico y ta un honor pa e t’ey na Aruba. E presidente tambe lo t’ey, y ta contento cu e lo bay bin Aruba.
E apertura ta gratis pa publico. E ta bay ta un show di kico ta gimnasia ritmico.
Dia 17 ta cobra entrada cual ta $10, cual ta e competencia di gimnasia ritmico. Dia 18 ta solamente pa atletanan y dia 19 si ta cobra entrada, cual ta 20 florin presale y por cumpra ticket na Avanse mes y 25 na porta, cual lo bay ta e evento mas grandi e aña aki. Tur evento lo tuma luga na Compleho Deportivo Betico Croes.
