Clifford Heyliger: No bende nos herencia pa un tayo di cuminda!

2009

Pa Aruba por haya un fiansa urgente di 204 miyon florin e luna aki ainda, Gobierno di Hulanda a presenta un pakete di condicionnan, riba varios tereno, cu mester cumpli cu ne sino no por conta riba e placa. Un di e condicionnan ta riba tereno laboral. Ex-Sindicalista Clifford Heyliger, a bisa “Nos ta bay bek na algo cu nos a sali caba. Nos tabatin flexibilacion, contract di duracion corto, tur e aspectonan aki nos a cambia nan pasobra den practica tin abuso di poder tumando luga”.

Den e lista di condicionnan impone pa Gobierno di Hulanda mara na e fiansaa stipula cu mester flexibilisa leynan laboral, permitiendo reduccion den orarionan di trabou, uzo di parttimers, reintroduci contractnan laboral di duracion cortico, suavisa ley di retiro, elimina tur estorbo pa por importa trahadonan stranhero. Tambe a menciona aumenta edad di pensioen di biehes pa 67 aña (den 4 aña di tempo).

Clifford Heyliger a subraya cu tin motibo dicon a haci e cambionan aki den leynan algun aña pasa, pasobra doñonan di trabou tabata abusa di nan trahadonan. Trahadonan no por haya un fiansa di banco pasobra nan no tin siguridad di trabou, asina nunca por yega na un auto of un hypotheek pa cumpra un cas. Tambe, e ta hala atencion di gobernantenan cu si hende ta bay perde trabou pa loco, nan lo no tin un garantia social pa por haya ayudo despues cu no tin entrada mas.

Pa e ex-sindicalista, pa djis kere cu si flexibilisa leynan laboral den cual lo por kita trahado mas facil y lihe di trabou, cu esey lo bay incentiva nos economia, anto Gobierno ta bon kiboca. E formula aki lo percura pa un cantidad di problemanan social y lo cambia henter e mercado laboral riba nos isla.

Clifford Heyliger: No bende nos herencia pa un tayo di cuminda!

Clifford Heyliger: No bende nos herencia pa un tayo di cuminda!

Posted by 24ora on Sunday, July 12, 2020

Hulanda: Evalua si mester keda accionista den companianan estatal

“Ora mi scucha Knops, mi so ta pensa cu e homber ki ta un tremendo politico, e ta papia bon. Pero, si nos bende WEB, Elmar y Setar, ken Bo ta kere ta bay cumpra nan? Ta e mesun riconan cu awor Knops ta bisando cu ta run Aruba. Dus na luga cu Gobierno ta cobra dividendo, awor ta otro compania lo haya e placa ey. E tipo di cosnan ey no necesariamente ta funciona manera nan ta mira for di Den Haag”, asina Clifford Heyliger a splica. E ta considera cu Gobierno lo gana un tiki awe pero lo perde on the long run.

WEB y Elmar tin un rol social den comunidad, den cual nan mester garantisa cu nan ta mantene prijs di awa y coriente mas abou posibel. Si mester hinca e companianan aki den man priva, di mes nan lo haci tur lo posibel pa por haci mas ganashi, a consecuencia di aumento den tarifa di awa y coriente. “Unda e beneficio pa e isla ta, ami no ta wak’e”.

No bende nos herencia pa un tayo di cuminda

Si Clifford Heyliger mester conseha Gobierno di Aruba den e situacion aki, e lo bisa nan: “No bende nos herencia pa un tayo di cuminda. Cos ta dificil, mi sa. Pero e ta hopi complica y mester tuma tempo pa discuti e cosnan aki. No core bay bay bisa si of no. Y un di e cosnan cu mi ta wak cu henter e entidad cu nan kier crea ta, e ta parce un Antias nobo. Nos tin un new normal pa Covid, awor nos tin un new Antilles. Si ta bay centralisa tur cos, nos tur sa cu e poder ta bay bek Corsou. Tur e lucha cu nos a haci, tur e trabou cu nos a haci pa construi nos pais, nos a bay di awa bruin pa awa di calidad na WEB. Claro cu aki aya nos mester sosten, pero tin algun aspecto cu ta bay hopi mas profundo di locual hendenan ta realisa”, asina e ex-sindicalista y awendia ehecutivo na WEB Aruba NV a expresa.