Den loke ta departamento di labor, a bini algun decision cu gobierno mester a tuma pa motibo di retraso den aprobacion di permiso. Gobierno a cera e parti di ‘werkplek onderzoek’ cu ta na DPL, y manda gran parti di e hendenan na DIMAS. Esaki a crea un otro problema riba su mes, segun Clifford Heyliger, parlamentario di fraccion AVP ta señala. “E problema ta cu e dunado di trabao ta busca trahado y no tin ‘toetsing’, nan ta hala Chef Rubiano pa pone un Chef cu nan ta trece di afo. Mi no ta kere cu esey ta e intencion.”
Heyliger ta apunta cu net e salarionan halto, of posicionnan cu salario halto, nos kier pa nos propio yiu di tera haya pa ora nan kier bin bek di studia. Aworaki mes hopi no kier bin bek, y si nos sigui opera di e manera aki, Heyliger ta bisa cu pio ainda. “Mi ta di acuerdo cu mester enfoca riba parti di permiso, pero nos mester cuida nos hendenan,” e parlamentario ta bisa.
Gobierno a laga sa cu nan lo inverti tempo y placa pa Departamento di Labor haya inspeccion na trabao. Lo duna gobierno beneficio di duda y ta spera cu esaki bay asina pasobra “nos ta creando economia pa nos pueblo, ta hende cu t’ey caba. Nos kier duna dispensacion caba na hopi cu t’ey indocumenta, awor nos no por crea un espacio mas hende di afo, cu ta afectando e trahadonan local,” segun Heyliger.
Esunnan cu a crea e problema, e director y su team di maneho (di DPL) con a para cu nan? E trahadonan tabata haci nan trabao di bin c’un evaluacion dentro di un siman, pero e permisonan tabata riba mesa seis siman of mas sin firma. Heyliger: “Mi’n wak niun accion tuma eynan. Bo tin autoridad pasobra bo tin un responsabilidad. E no a carga su responsabilidad bon, e ora nan tin cu trata cu ne. A bira tempo pa trata cu e hendenan cu no ta funcionando, cu a wordo poni eynan politicalmente, sacando tur beneficio politico, pero pueblo no ta wak e bek den e manera cu nan ta trahando.”
