Polis mester a intermedia na un bar restaurant na Santa Cruz pa un problema di cobransa, cu tabata menasa di escala den un bringamento.
Esaki a sosode diaranson banda di 11’or di anochi. Polis cu tabata den bisindario a yega hopi lihe na e sitio y a drenta e establecimento pa asina wak kico e problema ta. Mirando cu e ora di ciere a pasa caba y cu ainda tabata tin hende den e luga, a saca tur hende for di e luga.
E problema mes tabata sinta entre dos cliente cu e gerente di e luga. Segun informe no oficial, e dos clientenan tabata sinta den e bar restaurant ta come y bebe. Sinembargo ora ora cu a yega momento di paga nan cuenta, a ripara cu e gerente a cobra nan un suma mucho grandi y cu no tabata cuadra cu locual nan a consumi. A surgi un discusion entre e cliente cu e gerente tocante e cobransa cu dado momento a bay asina halto, cu e hendenan eyden mes a dicidi di yama polis.
Na final e cliente no a paga e suma halto, pero a paga solamente locual nan a come y bebe segun nan calculacion. E cliente a laga sa cu nan ta hopi desapunta y nan no lo drenta the New Peking nunca mas.
