Diahuebs pa 8:15am a habri Mega Stone Food Mart situa riba e caminda principal di Piedra Plat, net banda di unda antes tabata John’s Pizza. Net 15 minuut despues di a habri, un cliente a yega para dilanti di e supermercado y, segun su mesun version, su pia a bruha entre e pedal di “brake” y “gasolin” y consecuentemente a drenta cu e auto den e establecimiento.

E chauffeur femenino ta biba cerca y ta fiel cliente di e supermercado. Danki Dios e no a resulta herida pero si a spanta masha pa e impacto. El a basha henter e entrada di glas abou y a drenta mita cu su auto.

Cliente fiel di Mega Stone Food Mart a drenta e establecimiento cu su auto, causando basta daño na e edificio

Posted by 24ora on Thursday, May 10, 2018

Net unda el a drenta ta e seccion di cahero y unda ta bende alcohol y sigaria. E doño mes tabata tras di caha y a bula pa scapa su bida. E tampoco a resulta herida.

Nagico Roadservice y TRS Roadservice a presenta pa tuma declaracion di e chauffeur. E auto ta sigura y lo cubri e daño haci na e supermercado, tanto na e infrastructura como na e productonan cu a kibra dor di e impacto.

Takelwagen a presenta na e sitio, a saca e auto for di e supermercado y a pare pafo. A constata cu e auto por core ainda, pues no tabatin necesidad pa takel e pa hibe ningun caminda. E daño na e auto mes no tabata tanto manera e tabata mustra di leu.

“Mi lo keda habri normal. Ta drecha y haci limpi unda a kibra tur e glasnan y nos ta sigui”, asina e gerente Chines a duna di conoce, mientras cu clientenan tabaga sigui drenta pa haci nan compras, no obstante e desgracia na entrada di e establecimiento.

 

Comments

comments