Claudia Sims: “Afilia na un sindicato tabata nos ultimo opcion”

Claudia Sims ta server na Ruth Chris Restaurant na Aruba Marriott Resort & Stellaris Casino y ta splica cu e restaurant, como departamento, a dicidi cu lo bay tuma e paso y busca nan derecho laboral, cu ta e derecho di afilia na un sindicato. Hunto cu su coleganan, a dicidi pa tuma e paso, cu a yega di purba den pasado, pero nunca a logra cu Marriott. Tabata un paso hopi grandi pa e empleadonan.

Segun Claudia Sims, e ta kere cu nan tin mayoria di e team, pues 24 empleado. Na e momento di e referendum nan tabata 16. Despues di a warda e resultado di conteo, awo nan ta cla pa sigui cu nan lucha cu nan ta hibando pa añanan largo.

El a menciona cu a sinta papia cu gerencia. Tur aña nan ta haci un encuesta di nan opinionnan. Nunca e encuestanan ta sali positivo. Den pasado scorenan tabata asina malo cu hasta nan a trece psicologo pa nan, bisando cu e trahadonan ta e problema y no e hefenan. Semper ta e trahadonan ta esun cu tin e problema. A yega un punto cu a bisa cu ta basta y a busca solucionnan otro caminda.

Esaki no tabata un paso cu a djis dicidi di un dia pa otro cu ta bay bula den un afiliacion sindical. Pa añanan largo a purba di busca solucion y nunca a yega na un. Esaki tabata e ultimo opcion.

Un di e 16 trahadonan cu a vota durante e referendum dilanti Mediador di Gobierno, Anselmo Pontilius

Pa gana e sindicato nan lo tabatin mester di mita mas uno, cual ta 13. E trahadonan ta hopi orguyoso di a logra 16 voto y den forma unanime, tur trahado cu a presenta na e referendum a vota pa sindicato y niun a vota pa no envolvi sindicato pa representa nan ora si negocia cu gerencia di e hotel.

Riba e foto por aprecia Director di Recursonan Humano di Aruba Marriott Resort & Casino, Ruthline Tromp-Theysen, abogado di e hotel mr. Maura Brown y abogado di sindicato FTA, mr. Jose Figaroa

Cu e resultado aki awo riba mesa, e ekipo di Relacionnan Humano di e compleho di Marriott na Aruba, un di e hotelnan mas grandi riba nos isla, cu mas trahado y miho beneficionan di trabou, lo mester haci un evaluacion critico riba nan funcionamento y reflexiona si falta algo den contacto cu trahadonan, pa a yega na un situacion asina. E bataya cu FTA a gana awe tabata pa e restaurant so, pero sin duda e guera lo ta pa conkista e mas di 1500 trahadonan di e completo completo di Marriott na Aruba.

Comments

comments