Clase trahado lo bay hopi atras si Gobierno acepta condicionnan di fiansa

3764

E secretario general di Sindicato di Empleadonan Publico y Priva di Aruba (SEPPA) no ta na fabor di e pakete di 18 condicion cu Gobierno di Hulanda a presenta siman pasa, como condicion pa un fiansa di 204 miyon florin na Gobierno di Aruba. Aunke cu nos isla ta den necesidad urgente di fondo pa por sigui cubri FASE, Subsidio di Salario y gastonan di operacion di Gobierno mes, toch e sindicato mas grandi bou di empleadonan publico ta conseha pa no acepta, de lo contrario esaki ta bira un sla grandi pa e clase trahado!

De un entrevista exclusivo awe cu 24ora.com, nos a puntra e sindicalista, cu tin 20 aña na cabes di e sindicato y 38 aña trahando den e mundo sindical, riba con e ta mira e lista di condicionnan riba mesa y con Aruba por atende cu nan. “E cambionan ta devastado. En bes di bay dialnti, nos ta bayendo atras, esta e clase trahado”, asina e sindicalista a expresa.

Entrevista: Sindicato SEPPA ta conseha Gobierno di Aruba pa no firma e pakete di condicionnan pa haya fiansa di Hulanda. E clase trahado lo mas hopi atras den e acuerdo aki!

Entrevista: Sindicato SEPPA ta conseha Gobierno di Aruba pa no firma e pakete di condicionnan pa haya fiansa di Hulanda. E clase trahado lo mas hopi atras den e acuerdo aki!

Posted by 24ora on Tuesday, July 14, 2020

Aunke cu ainda no ta papia specificamente cuanto empleado publico mester bay cas of cuanto di nan salario mester baha, toch e ta sinti cu ta den e direccion ey ta bayendo. Pa hopi aña caba ta scuchando cu tin demasiado empleado publico, pues ta mas cu duidelijk cu e intencion ta pa baha e cantidad di trahado y tambe mishi cu nan beneficionan. Es mas, ta sinti cu Gobierno lo bay corta pisa den subsidio na e fundacionnan cu di nan banda lo haya nan ta kita trahadonan tambe.

Magali Brito a finalisa consehando Prome Minister Evelyn Wever-Croes pa no firma y acepta e condicionnan manera cu nan ta. Si haci esey toch, mester ta consciente cu pa un saco di placa, nos ta dal e clase trahado un sla bou faha y lo tin hopi consecuencia social y laboral pa nos pais. Brito ta lamenta cu Hulanda a haci uzo di e oportunidad unico cu Covid-19 a duna, pa awor soluciona algo cu Hulanda kier a haci for di masha aña caba. E ta puntra su mes, kico flexibilisacion di leynan laboral tin di haber cu e fiansa, kico kitamento di hende di trabou, kico e benta di accionnan den companianan estatal tin di haber?

SEPPA ta convenci cu Gobierno di Hulanda no mester yuda Aruba, sino e tin obligacion di para pa nos como pais den Reino. Es mas, Aruba tin un masha bon nomber den cumplimento cu pago di nos debenan na Hulanda. SEPPA ta sigur cu esaki tambe nos lo traha duro pa pag’e bek, pero hamas mester acepta menasa y presion di Hulanda pa un fiansa, anto entrega nos autonomia cu tanto nos a lucha pe durante decadanan largo.