Civil a causa accidente cu auto di Gobierno!

Riba dia nacional, Dia di Betico, a sosode un accidente na altura di S-Chow Supermarket na Savaneta. Un motorcycle coriendo direccion pariba a dal tras di un auto, ora cu e RAV4 a lora pa bay e ATM machine na man robes sin mira den spiel pa mira cu e motorcycle tabata biniendo. E chauffeur a purba maniobra cu e motorcycle pero a cay y herida su mes levemente.

Na e sitio a tuma nota cu e auto marca Toyota modelo Rav4 ta pertenece na Gobierno di Aruba y ta den e poder di e “Chef de Bureau” di Minister di Finansa, Xiomara Ruiz-Maduro. Esey riba su mes no ta problema, accidente por sosode cu tur hende.

Locual si ta cuestionabel ta cu e chauffeur di e auto di “Dienst” ta un civil, ex-Polis Chu Rincones cu ta pareha di e ehecutiva trahando na Ministerio di Finansa. Pa ley esey ta un delito, pasobra casa of pareha di e ambtenaar no mag stuur auto di Gobierno. E hecho cu e auto di pueblo ta keiro rond riba caya riba un dia liber ta un asunto caba cu por lanta interogatorio.

Sinembargo, e Minister politicamente responsabel pa su coordinadornan a sali defende mesora y a pidi pa no pone atencion na e accidente sino pa tene cuenta cu e debe di Gobierno. Claro, cu si civilnan sigui kibra auto di Dienst y pueblo mester paga, tampoco lo no baha nos debe nacional.