Ciudadano rabia: Ciudadano disgusta cu Team di Aresto di Polis

George Solognier, biba den apartamento 2A den Sin Vincentweg, a pasa den un trauma diaranson na momento cu Team di Aresto a invadi su apartamento sin cu e tabatin nada di haber cu un atraco cometi algun shen meter mas leu den Scopapelstraat.

George y su pareha ta biba den e apartamento aki y nan tabata drumi ainda ora cu a basha e porta abou, hincando nan den e susto mas grandi den nan bida. E momento ey nan no tabata na altura cu un atraco a tuma luga na Tarabana.

“Nos a tende un zonido duro pero a kere hende trahando pafo. E di dos zonido duro a bira ora cu nan a drenta nos camber, ranca e deken y a bisa nos bira boca’riba. Mi señora a bay den panico y a bisa nan cu nos ta sin paña. Asina nan a hinca mi señora den baño, y a tira un short pa e bisti. Despues nan a hib’e den sala. Ami nan a birami boca’bou, a boei mi mannan y a pone un cusinchi riba mi cabes,” George a conta 24ora.com.

Ciudadano rabia: Ciudadano disgusta cu Team di Aresto di Polis

Ciudadano rabia: Ciudadano disgusta cu Team di Aresto di Polis. Click link pa mas: https://24ora.news/3fo48Ff

Posted by 24ora on Friday, June 12, 2020

El a sigui conta cu despues di mey ora den e posicion ey, el a informa e Polisnan cu e ta sofocando, pasobra e tin problema cu respiracion (un problema cu semper e tabatin). Asina tempo a sigui transcurso y unico momento cu nan pone atencion na dje ta kita e cusinchi un rato pa puntr’e si e tin arma den e cas, cu el a contesta negativo. Despues atrobe a pone e cusinchi. Ta hopi rato despues cu nan a drenta, e dicidi di bistie un short. Un ora despues e fiscal a duna Polis ordo pa kita e boei.

E cabayero a splica cu e no tin problema cu Polis ta haci su trabou, pero si un abuso pa e forma con a trat’e, sin cu e tin nada di haber. Polisnan a actua riba un tip, pero e ta haya cu facilmente por a descarta esaki si a mira e camara di filmacion cu tin dilanti e apartamentonan. Na final a bay wak e video y a constata berdad cu e auto a lora, pero no a baha niun hende.

Ademas, e ta haya cu polis por a actua diferente si nan mes ta bisa cu nunca tabatin problema den e caya unda cu e apartamentonan ta situa.

E ta haya cu e forma di actua no tabata corecto, no solamente con a haci cu nan, pero si a resulta berdad cu e atracadonan tabata eyden y arma, tin hendenan inocente por a wordo mata door di e actuacion aki. 

Hasta e doño di apartamento a ofrece pa habri e apartamentonan pa nan drenta. E resultado tabata cu e actuacion a causa hopi daño.