Junior Rivas, ta un ciudadano preocupa cu tin mas di binti aña trahando den sector turistico. E ta cuestiona e forma con Center for Disease Control and Prevention (CDC) ta atende cu Aruba. Pa Rivas, CDC ta para pa Center Damaging Comments of Publication.
Ta sinti cu den pleno ‘high season’ Aruba ta sufriendo di un cantidad minimo di turista na Aruba. Tur esaki debi na e conseho negativo cu CDC a conseha e turistanan pa; no biaha pa Aruba. Rivas ta stimula pa sea ATA of Minister Dangui Oduber duna atencion na e situacion serio aki. Segun Rivas, ta un custumber cu e ‘high season’ ta core for di 15 di december te cu 10 di april, pero ta parce cu 2021 pa 2022 a conoce un baha drastico den turismo. Pa e ciudadano, tin tres factor cu a hunga un rol grandi. E prome; caso nan halto di contagio, di dos; no ta ricibi resultado di testing na ora pa por aborda e avion y di des; personal di aerolinea ta bira malo y avion no por sali for di pais di origen. E parti mas alarmante, ta cu CDC a pone Aruba riba lista di ‘red list’ y ta conseha e turistanan pa no biaha pa Aruba.
Rivas ta sinti cu tanto ATA y minister encarga cu turismo por haci un poco esfuerso pa convence CDC pa kita Aruba for di e ‘red list.’ Si haci un comparacion cu aña pasa den luna di augustus ora cu e casonan di contagio a baha drasticamente compara cu otro paisnan rond mundo, CDC a dura cinco siman pa saca nos for di ‘red list’ compara cu otro pais a kita nan den a penas dos siman so.
Rivas cu pregunta na ATA y Minister Dangui Oduber
- Kico ta e criterionan pa un pais wordo postula riba e ‘red list’ ?
- Con ta midi e casonan di contagio?
- Con CDC ta update un pais for di e ‘red list’?
“Nos no por permiti pa CDC sigui plunder Aruba su nomber y no ta haci nada”, asina Junior Rivas, un trahado di sector hotelero a vocifera. Segun informacion di Rivas, CDC ta hunga un wega sushi cu nan conseho pa nan propio beneficio. Ta conseha e ciudadanonan di Merca pa no sali for di e pais mirando e economia di Merca mes ta hayando un sla duro.
Recientemente Rivas tabata den contacto cu un turista cu tur aña ta regresa Aruba pa vakantie. A puntr’e si e lo bin Aruba e aña aki, y e amigo a contest’e: “debi na e conseho di CDC, cu Aruba no ta sigur, e no lo bishita Aruba e aña aki y ta spera di pronto ta bek.” Pa Rivas henter e consehonan di CDC ta di mala fe y kier boycott Aruba.
