Eri Donata ta un ciudadano cu a bin ta luchando pa algun aña caba pafo y den Corte un caso relaciona cu accidente di trafico. Un bataya di algun aña y cu awe el a dicidi di comparti cu pueblo y na mesun momento pidi e representantenan di pueblo, esta Parlamento pa haci cambionan pa protege e ciudadanonan di e actonan inhusto, cu e ta bisa, na man di companianan di seguro.

Tabata diabierna ultimo den oranan di mainta cu el a entrega un carta na Parlamento di Aruba pa un biaha mas haci denuncia di abuso cu industria di seguro ta comete, ya pa decadanan caba, contra pueblo di Aruba.

Ademas di e carta, el a haci un peticion pa Parlamento di Aruba pa tuma paso for di puesto di autoridad legislativo supremo pa trece cambionan integro den conhunto di ley corespondiente pa proteha e pueblo contra tal abuso. E carta el a manda pa prensa di Aruba cu e peticion pa publica esaki integralmente pa pueblo ta na altura di delaster detaye di e caso aki.

E carta ta basa riba su experencia y bataya di 6 aña contra New India Assurance, pafo y den Corte. “E odisea a cuminsa despues cu un cliente di New India Assurance a causa accidente den cual a laga mi auto totalmente destrui, lagando mi cu problema di salud, sin auto y cu debe na banco riba e car loan. Pa colmo, e auto tawata mi fuente di entrada como taxista.”

Banda di loke e carta ta revela, Donata ta bisa, tin mas elemento- of factornan cu ta building blocks di tal abuso, pero pa inclui tur den un carta lo haci e carta demasiado largo. “Hecho cu por a agrega aki ta si, cu abogadonan y corte a tratami desde principio den formanan hopi humiyante, obviamente pasobra mi ta un “zomaar iemand”, y tawata presenta na Corte cu mi unico testigo fisico kende ta esun cu a trece mi na mundo, sin abogado. Pero durante e bataya y na final, corte y abogadonan lo mester a conclui cu ta berdad cu Dios ta obra pa medio di humildenan.”

E ta bisa cu ta preocupante cu e abuso ta bira pio segun cu tempo ta pasa. Por ehempel, awor no solamente cierto companianan di seguro ta trapa riba principio di ley di compensacion, pero awor tambe ta mal informa nan victimanan riba kico ley di trafico ta stipula. Uzando mal informacion riba ley di trafico como base, parce cu tin un tendencia nobo cu compania di seguro ta duna 50/50 culpabilidad na tur dos banda den accidente, cu cual strategia maligno ta purba paga solamente 50% di compensacion corespondiente. Cu tempo e situacion ta keda empeora.

“Ta carga speransa cu Parlamento di Aruba haci uzo di su autoridad legislativo supremo, estableci pa medio di democracia, y cuminsa traha pa bienestar di e pueblo en general y no pa bienestar di aristocratanan so. Ta spera tambe cu semper pueblo por conta cu sosten di prensa, pa hiba dilanti e lucha constante contra inhusticia,” el a bisa den su splicacion cortico di loke el a pasa aden y loke tin skirbi den e carta di 10 pagina entrega na Presidente di Parlamento. 

Comments

comments