Den fin di siman tabatin un problema a surgi un biaha mas na Savaneta, entre doño di e negoshi Rising Dragon Bar & Restaurant y un bisiña. Un problema cu a sali for di man cu e Chines agrediendo e bisiña.
E bisiña Jimmy de Lanooij awo den un declaracion duna, ta pidi pa husticia prome cu e situacion sali completamente for di man. E ta lamenta cu despues di e sucedido y cu el a entrega keho, e comerciante Chines a wordo laga liber e mesun dia. “Mi kier pa e hendenan sa cu siguridad aki na Aruba ta den peligro,” el a cuminsa pa bisa.
Diadomingo e dos personanan aki a haya problema un biaha mas, ora cu e comerciante a bay muha e matanan atrobe cu awa di pos, sacando un holo horibel cu tur e bisiñanan a bin ta soportando pa basta tempo. Diadomingo a bin un discusion fuerte te cu e comerciante a dal su bisiña cu un obheto.“Loke a pasa cu mi por pasa cu boso yiu y famia mañan. Mescos cu ami a keda sin husticia, e por pasa cu otronan tambe.”El a cuminsa pa splica cu e problema ta andando for di aña 2016 ora cu el a haci e prome denuncia cu simplemente a keda den computer pasobra Polisnan no a haci nada cu e caso aki.
“Awo nos mes como pueblo ta cuminsa move.” El a mustra riba e PV di e sucedido di diadomingo ultimo, unda cu despues di 4 ora, e comerciante a wordo laga liber. Loke e kier ta pa e comerciante stop di kima y muha su matanan cu awa di poz, no solamente pa e holo cu esaki ta manda pero tambe pa salud di tur esnan bibando den e area ey. “Lamentablemente mi no ta haya apoyo. Nan ta haci show pa cara di e hendenan. Despues nan ta keda keto y tur cos ta muri. Nos di Savaneta ora cu nos haci un cos, nos ta hacie bon.”E no ta compronde ki prueba mas autoridadnan mester pa actua contra e homber aki. Tin video unda cu por wak cu e comerciante a agredi’e. “Mi no sa kico mas nan ta spera, pa e bolbe dal mi of matami, mescos cu e caso di e Chines cu a mata e otro Arubiano.
E siguridad na Aruba ta na peligro. Nos como pueblo mester uni y cuminsa move. Si cada bario cuminsa riba su mes, y uni lo por yega hopi mas leu en bes di sinta man crusa riba husticia na Aruba. Ta parce cu no tin husticia at all na Aruba. E cos aki mester stop e luna of e aña’ki. E lo stop den bon of den malo, pero e ta stop si.”El a cuestiona con mientras cu e tabata na IMSAN sperando pa wordo atendi pa su lesionnan, e comerciante tambe a yega eynan. Despues na cas atrobe e comerciante a saca un cuchiu riba dje. Pa finalisa e ta bisa cu Arubianonan ta soporta demasiado cos.
