Cinco scol lo participa den Step it Up Aruba

Den un ambiente alegre a inicia e proyecto Step it Up Aruba. Lider di e proyecto, Rafael Garcia a conta cu e  proyecto aki a participa den Pitch Time, un proyecto di CEDE Aruba. Step it Up su mision ta pa duna CKV su balor pero tambe arte en general na e scolnan secundario. Lo duna e hobennan tayer di baile, salud como tambe nutricion.

Awe, oficialmente a lansa e programa di Step it Up Aruba pero tambe por a conoce e participantenan. Total cinco scol lo participa den e prome edicion, esey ta un total di 56 studiante. E scolnan cu lo participa ta Abraham De Veer, Maria College, Mon Plaisir College, De Schakel y tambe SPO Santa Cruz.

E meta di e proyecto aki ta pa e scolnan cu a participa por uni pero tambe pa desaroya nan talento y duna arte su balor. Dia 20 di november, riba Dia Internacional di Derecho di Mucha, lo tin un competencia. Rib e dia aki, e scolnan lo presenta un baile cu nan mes lo crea a base di e tres tipo di baile cu Step it Up lo brinda nan.



Por ultimo Garcia a informa pa tur persona cu ta interesa por sigui nan riba Facebook y asina haya sa mas tocante di e proyecto. Tambe a gradici tur cu a haci e proyecto aki un realidad.