E crucero Braemar a yega Corsou ayera notificando cu tin hendenan cu por tin sintoma di Covid-19 (coronavirus). E Departamento di Epidemiologia a aborda e barco p’asina mira e situacion y haci test na e personanan cu por ta contagia cu coronavirus. A haci test na e personanan riba e crucero, di cual 5 a resulta positivo di e coronavirus. Prome a bisa lo haci test na 4 persona, pero despues a haci test na 7 hende abordo. E motibo dicon a test 7 hende tabata cu den e biahe anterior 1 tripulante tabatin yen contacto cu personanan y 2 dia despues cu e pasaheronan a baha for di e crucero, el a sali positivo di Covid-19.
A isola e tripulante mesora, pero el a bira malo cu keintura halto y tosamento, cual ta sintomanan di e virus. Apart di a isola e tripulante, a resulta cu tabatin mas hende cu e mesun sintomanan y a dicidi di test mas hende. Asina e cantidad di hendenan cu a test tabata 7, y e resultado a drenta den oranan di nochi. Dr. Izzy Gerstenbluth, Hefe di Departamento di Epidemiologia, a bisa cu di e 7 personanan, 5 a test positivo pa Covid-19, 1 ta inconclusivo pero mirando kico ta pasando por consider’e tambe positivo y 1 a sali negativo. E negativo tambe por ta cu ainda e no tin e sintomanan y ta un caso cu a pone nan duda si ta uno leve.
Informa siguiente waf
Despues di tin e prueba cu riba e crucero tin Covid-19, Corsou tin e obligacion di informa otro wafnan cu e barco tin Covid-19 abordo. Tur cos ta bay segun un sistema di National Focus Point, cual esun di e islanan ta na Hulanda. E regla ta dicta cu cada pais tin un focus point y no mas. Como cu Corsou no ta independiente y ta forma parti di Reino Hulandes, a informa Hulanda. A manda un email na e siguiente waf cu tabata Barbados, pero dr. Gerstenbluth no tabata sigur cu nan a ricibi esaki den oranan di anochi. Mirando cu den oranan di anochi e resultado a drenta, nan a busca otro canal via PAHO pa duna informacion na Barbados. Na momento cu barco tabata rumbo pa Barbados, Departamento di Epidemiologia a haya informacion cu nan no a bay Barbados y a keda circula den area di Boneiro, pasobra Barbados no tin luga pa baha nan.
Baha pasaheronan
A haya informacion cu a pidi pa baha e hendenan na Aruba, pero Dr. Gerstenbluth a conseha Aruba pa no acepta esaki. El a splica cu ni Aruba como Corsou tin capacidad pa pone nan den cuarentena. El a informa PAHO cu islanan chikito no tin e capacidad pa isola hopi hende. A yama focus point na Hulanda y a dicidi pa haci un video call cu PAHO y Barbados y instancianan concerni pa busca un solucion, ya cu e ta bira un problema internacional. PAHO a pidi Gerstenbluth pa ta e persona di contacto y un biaha mas lo tene conferencia cu e barco pa mas informacion. A tuma contacto cu e doño di e barco pa mira si ta dispuesto pa manda avion. A pensa di uza avion pa hiba e hendenan nan propio cas bek. E nacionalidad di pasaheronan riba e barco ta Filipino, grupo grandi di Tailandes, Indio, Indones y Ingles. Di Hulanda tin 1 of 2 hende riba dje.
Mester mira unda por mara e barco y desembarca e hendenan na un manera safe, pa asina por manda nan bek pa nan pais. Ta uza e nomber cuarentena ora tin contacto cu hende cu tin e virus y por bira malo, mientras isolacion ta nifica cu e persona ta malo caba y no mag tin contacto cu otro hende. Niun pais den region tin e capacidad pa baha 1000 hende. Ta buscando un solucion y percura pa tur cos bay bon, pa nan haya e necesidad basico, cosnan di come y bebe.
Awo tin 9 hende isola y poco poco e ta subiendo, segun dr. Gerstenbluth. Aparentemente e isolacion no a bay bon, pero awo ta isolando tur hende malo. No sa con bon e sistema di isolacion a bay pasobra no sa cuanto hende tabatin contacto. Ya caba tin 5 hende sigur cu e virus, 1 ta probabel, 1 negativo y 3 cu ainda no a haci e test. A sugeri pa purba minimalisa e cantidad di hende bini hunto y a tuma sugerencia pa esaki. Den nan tin 2 cu pulmonia y ta haya antibiotica, pero no ta severamente malo. Dokter a indica cu niun di 9 ta malo pa tin cuido hospitalario. E barco ta mara den area di Boneiro, pero ta buscando solucion cu sea Barranquilla of Cartagena pa mira si nan por laga avion baha eynan pa manda e hendenan bek nan pais. Si esey no ta e caso, lo mira si e Inglesnan ta dispuesto, si no ta asina lo check cu Francesnan y Hulandesnan. No ta mucho cla ainda pa dr. Gerstenbluth kico tur ta bay pasa.
