Den un articulo anterior a informa e recien publica cifranan di poblacion te cu 2023. Anteriormente e cifranan disponibel tabata te cu aña 2022. Awo a bini un update unda cu ta inclui esun di 2023. Y e cifra nobo ta mustra cu te cu final di 2023, e poblacion di Aruba tabata conta cu 107.566 persona. Den e aña ey tabatin 856 nacemento y 814 fayecimento.
Den aña 2023 a nace mas baby mucha homber cu mucha muhe (456 y 400) y den fayecimento tambe tabatin mas hende homber cu hende muhe a fayece (426 y 388).
E cifranan di aña 2023 ta mustra cu 856 baby a nace, e crecemento natural di e seccion aki tabata 30 baby mucha homber y 12 baby mucha muhe. Den migracion, si mira e cantidad di hende hombernan cu a bay y esnan cu a drenta, e diferencia net di migracion ta 89 hende homber y esun di hende muhe ta 283.
E cifranan (nobo) mas interesante ta esnan di matrimonio y divorcio. E ta alarmante pasobra por a nota cu for di 2015 pa awo e cifranan di divorcio ta mas cu 50% di e cantidad di matrimonionan. Y e aumento mas drastico tabata den temporada di e pandemia di Covid.
Por mira riba e grafico cu ta compaña e articulo aki cu na aña 2015 tabatin 835 matrimonio y 405 caso di divorcio, pues un 48.5% divorcio pa e cifra di matrimonio.
Di aña 2015 te cu aña 2023, e aña cu e cifra di mas matrimonio ta hustamente aña 2015 ora cu 835 persona a casa. Despues di esey bin ariba, e cantidad di casamentonan a cuminsa baha y na 2020 tabatin e cifra mas abou di matrimonio cu tabata 307.
Si ta papia di divorcio e aña cu mas caso di divorcio tabata tin ta na aña 2016 ora cu a registra 428 divorcio. Y esun cu menos divorcio tabata aña 2020 cu 287 pareha cu no kier ta casa cu otro mas. Pero si haci un comparacion entre e cantidad di matrimonio y esun di divorcio, anto por tuma nota cu na aña 2020 un 93.5% di e cifra di matrimonio tabatin na divorcio tambe. Pues, tabatin 307 pareha cu a bisa otro SI, y 297 a bisa otro NO MAS.
Y tambe por nota cu for di aña 2016 bin ariba, y porcentahe di divorcio ta riba 50% di e cifra di casamento.
Den e area di mamanan hoben, por nota cu e cifranan no ta alarmante, pero toch cos pa want den mente. Esaki pasobra na aña 2022 den e poblacion di 3313 mucha muhe den edad di 10 pa 14 aña, no tabatin ningun mucha muhe cu a sali na estado. Y na aña 2023 e cantidad di hobennan di e edad ey a baha pa 3261 y tabatin dos mucha muhe menor di 15 aña y mas grandi cu 10 aña cu a bira mama.
Si mira den e categoria di 15 pa 19 aña, e cifranan ta mas halto. Na aña 2022 tabatin 3274 damita den e edad di 15 pa 19 aña y tabatin 33 cu ta mama of a bira mama. Y na aña 2023 esaki tabata 3299 damita y 42 di nan a bira mama.
E cifranan di poblacion ta mustra cu e categoria cu mas ciudadano ta den e categoria di 95 aña of mas. Den e categoria aki tabatin 33 hende homber y 73 hende muhe. E poblacion mas grandi ta den e categoria di 60 pa 64 aña den cual tin 3911 hende homber y 4625 hende muhe. Y sigui pa e categoria di e grupo di persona di 55 pa 59 aña den cual tin 8374 ciudadano, mayoria hende muhe.
Di e grupo di ciudadanonan cu a bandona Aruba na aña 2023 mayoria tabata Rubiano, Antiano of Hulandes Europeo.
Pa esnan interesa den e datonan aki por subi riba: https://cbs.aw/wp/index.php/2020/05/18/population/
