Cifranan di e cantidad di victima cu ta contagia cu e virus Covid-19 a sigui aumenta na Hulanda. Principalmente bou di hoben y studiantenan cu no ta tene nan mes na e reglanan vigente cu Rijksinstituut voor Volksgezondheid en Milieu (RIVM) y gobierno di Hulanda a implementa. Hobennan bou di edad di 16 pa 28 aña ta entre esunnan cu mas cifra a subi.
Na tur parti d Hulanda na e momentonan aki Gemeentelijke Gezondheidsdiensten (GGD) ta ehecutando testnan riba tur persona. Testnan ta gratuito y boluntario. Motibo cu hopi di esunnan cu tabata portado (asymptomatic) awo a bin dilanti, ta hendenan cu no a bira malo pero tabata carga e virus y cu posibilidad grandi di por a contamina otro hende. Posibilidad entre otro den barnan, localidadnan cera, klasnan di scol y den misanan.
Informacion cu Godfried Adem, Periodista di 24ora.com na Hulanda, a duna awe ta cu seis dia pasa RIVM a manda un comunicado caminda ta indica cu laborarionan na Europa a constata cu e virus ta airborne, ta desplasa su mes via aire. Ta un punto cu hopi no a para keto riba dje. Hopi ta e profesionalnan medico y di salubridad publico tabata di pensamento cu esaki lo no ta e caso.
A implementa reglanan nobo
Den cuidadnan grandi di Hulanda, manera Amsterdam y Rotterdam caminda tin aglomeracion di hende cu ta desplasa nan mes, ta bira obligatorio e uzo di tapaboca. Specialmente den cayanan grandi, mercadonan y supermercadonan na Hulanda, pa evita di plama e virus aki.
Cifra ta sigui aumenta
Informacion cu Godfried Adem a duna ta indica cu mientras cifra ta sigui aumenta, organisacion di cuido intensivo na Hulanda como anestesiologia ta premira cu dentro di dos siman, e pashentnan cu lo tin cu drumi den camber di cuido intensivo, lo aumenta atrobe.
Ta mira e “second wave” di infeccion di coronavirus na caminda pa Hulanda. Ta conseha e islanan pa aplica e medidanan recomenda, evita aglomeracion den grupo grandi, para fiestanan manera a para tur esunnan na Hulanda, uza tapaboca y evita di ta complice di contagia mas hende cu e virus.
