Christina Lampe: Ta un momento historico pa Curpa

Lider di Partido Curpa, Christina Lampe a presenta na EPB Hato, caminda el a bay deposita su voto. E tabata compaña varios candidato, entre nan pa Benjamin Francees, kende a hiba un campaña bastante partido.
El a splica cu esaki ta un momento historico den tur sentido. E campaña a bay hopi bon. Nan a hiba un campaña cu e principionan di Dios y mustrando riba tur e puntonan cu mester a wordo mustra riba nan. A mustra riba amienda 7, riba e tantisimo corupcion cu tin, a mustra riba imigracion, riba pobresa, etc.

Recepcion di comunidad
E recepcion tabata hopi bon. Ta prome biaha cu nan ta experencia un partido Cristian. Pero tin cu bisa cu e recepcion tabata hopi grandi mes. Mirando e tempo cu tabata asina corto, a logra haci hopi pa por conserva y mantene e principionan di Dios bibo den nos pais.

Asiento
Lampe a splica cu e partido ta kere cu un coalicion ta na su luga awor aki. Pasobra mirando loke a pasa cu e partidonan tradicional, no kier pa hamas e bolbe sosode. Pa Curpa un coalicion ta completamente na su luga y ta e tempo preciso pa tuma luga.

E dia di mas special
Tur e puntonan cu a bin dilanti ta keda den memoria. E ta un momento historico p’e mes. Y e ta kere pa e otro candidatonan tambe. E manera cu nan a wordo scogi ta yamada tras di yamada di Dios. Esun di mas importante ta e momento cu Lampe a confirma ora cu a acerk’e, cu el a confirma cu esaki ta loke Dios kier pa e haci na e momentonan aki.

Expectativa
Su expectativa ta hopi grandi pasobra a hiba un campaña di un comienso nobo. Di un Aruba completamente nobo. Kier mira cara nobo, kier mira hendenan fresco. Algo completamente nobo. Pesey tin e confiansa cu e pueblo lo duna Lampe como lider y tur e candidatonan di Curpa, e confiansa pa nan por drenta parlamento y haci un diferencia grandi na Aruba. Ta deseo di Lampe pa Aruba.

Dos puntonan mas importante
E punto mas importante ta amienda 7. Pasobra esey ta e base, e fundeshi pa cual bo ta construi un pais. E otro ta loke a hiba campaña contra dje, ta corupcion. Despues cu bo tin e fundeshi limpi y cla, e ora bo ta coy e corupcion e ora bo ta elimin’e completo. Di e fundeshi ta depende di Pueblo riba su norma y balornan, principionan di Dios cu ta goberna y enaltece nos pais.