E Kartodromo di Laguna Viva na Villvicencio ta sede di e competencianan di Rok Cup di Go Kart cu ta tuma luga e fin di siman aki.
Un di e pilotonan cu ta participando den e caredanan na Colombia ta Christopher Arends, cu tin su mesun team. Esnan cu ta forma e circulo di su team ta su tata Edwin Arends y su ruman Edwin Arends jr., kende despues di tabata piloto, awor ta mecanico di e auto di su ruman.
Chris a competi pa prome biaha tres aña pasa ora cu tabatin un Panamericano, cu el a haya tabata un tremendo careda pa e acumula experencia. Principalmente mirando cu pilotonan internacional manera di Peru y Ecuador cu tambe ta participa.
E caredanan di Rok Cup ta un bon preparacion pa e competencianan mas fuerte cu lo tin den e Panamericano na juli.
Chris ta participa den e categoria Master, cu ta 32 aña bay ariba. Den e competencia aki el a analisa su mes cu e diferente rivalnan mas cerca y e ta conclui cu e ta logrando un bon tempo. E fastioso ta cu e tempo continuamente ta cambia, un rato solo y cayente y despues awa ta yobe. Cada biaha e ta un otro setting. E bon ta cu el a yega tempran pa training y cada biaha e tabata logra baha su tempo cu mita of un seconde pa duna un miho presentacion den e final.
