China ta adverti: Nan no tin “Corona Virus” bou control

E Minister na cabes di e Conseho Nacional di Salud na China, a bisa awe cu e coronavirus nobo ta extendiendo cada biaha mas rapido y cu ta spera mas caso nobo. Na e mesun momento, ainda tin hopi incertidumbre riba e naturalesa di 2019-nCoV. Minister Ma a confirma diadomingo cu e capacidad di plamamento di e coronavirus nobo parce ta creciendo.

“Ainda no tin claridad riba e riesgonan cu e virus lo plama mas,” el a bisa. Sinembargo parce cu e peliger cu e virus aki ta representa pa hende di diferente categoria di edad, ta cambiando. E cantidad di morto pa e brote di e coronavirus nobo a aumenta na 56 diadomingo mainta.

A informa di mas cu 2 mil caso di infeccion rond mundo, di cual e gran mayoria, 1975, ta na China mes. E teoria actual di autoridadnan Chines ta cu e brote a cuminsa den un mercado di pisca na Wuhan, un ciudad cu 11 miyon habitante den centro di e pais, unda cu a comercialisa animalnan exotico ilegal. Gobierno Chines a anuncia diadomingo un prohibicion nacional pa comercio di animalnan exotico manera colebra, krokodil y badger.

Sinembargo, segun Ma, ta keda hopi pa aclarea riba e origen di 2019-nCoV. “Nos por determina cu ta posibel cu e virus ta bin di un animal salbahe” el a bisa.

E virus tambe ta contagioso durante periodo di incubacion

E tempo di incubacion di e virus, cu a haya e nomber di 2019-nCoV, ta di 1 pa 14 dia. Den e periodo aki, caminda cu e pashent ainda no ta mustra señalnan di e enfermedad, ya por infecta otro hende. Den e sentido aki, 2019-nCoV ta diferencia for di e virus SARS.

E virus nobo ta causa un alarma debi na su plamamento rapido y pa falta di conocimiento riba con peligroso y contagioso e ta. E por causa pulmonia, cu por ta fatal den algun caso. “E conocemento cu nos tin riba coronavirus ta bastante limita,” e Vice Minister di salud di China, Li Bin, a bisa awe diadomingo.

“Progreso constante” den control di brote

Li tambe a bisa cu expertonan ta kere cu e plamamento di e virus por para si e medidanan actual bira efectivo. “E medidanan cu nos a tuma te awor aki ta riba un liña cu e situacion cu ta rond di e brote,” Li a bisa. Autoridadnan Chines a cera 15 ciudad como medida. Varios caminda eynan ta blokea y transporte publico a para. A cancela casi tur vuelo pa y for di aeropuerto di Wuhan. Ayera autoridadnan di e provincia di Hubei, di cual Wuhan ta e capital, a pidi pa mas mask protector y paña special. Gobierno Chines ta purbando di cumpra nan den exterior.

Paisnan cu ta purba preveni un pandemia

Gobiernonan rond mundo ta purbando di evita cu e brote di e virus ta bira un pandemia (un epidemia na escala mundial). Australia a confirma cuater caso, mescos cu Malaysia. A conoce un caso na Canada. E virus tambe a surgi na Merca, Tailandia, Zuid Korea, Hong Kong, Hapon y hasta na Europa.

Francia a confirma tres caso di infeccion diasabra. Un persona malo na Belgica a causa basta spanto, pero e homber parce tabatin griep. Ainda no a informa di posibel casonan di infeccion na Hulanda. Minister Bruno Bruins di Salubridad Publico, a bisa diasabra cu Hulanda ta vigila di cerca e evolucion di e coronavirus nobo. E instituto Nacional di Salud Publico y Medio Ambiente (RIVM), lo emiti un recomendacion pa e gabinete dialuna. A base di esaki, e Minister lo determina si mester tuma medidanan adicional.