Chill hunto cu D’Licious ta organisa e Chill Big Papito Tournament pa tres dia na veld di Kudawecha riba dianan 4, 5 y 6 di October proximo. E competencia di softball lo ta combina cu un fiesta.
A bin cu e idea aki despues di a ricibi hopi peticion pa tin softball y fiesta, asina Jerrino “Bass” Ridderstap, cantante y doño di D’Licious, a expresa. E parti di torneo ta masha interesante, pasobra lo por gana e pot di 5000 dollar pero esaki lo por sigui subi segun e inscripcion cu bay. E pot lo por yega hopi halto, unda a cuminsa cu 5 mil dollar pero ya caba ta subiendo di e inscripcionnan cu ta drentando.
Lo cuminsa diabierna anochi cu un fiesta cu e banda “One” di Corsou hunto cu DLS y invitado special den club Fiesta, na ex Emotions. Lo tin un fiesta bailabel despues e fin di siman di torneo y diadomingo lo saca e ganado. Lo celebra esaki den grandi hunto cu invitadonan di Corsou y Boneiro na veld di Kudawecha.
Pa basta tempo a papia riba esaki caba y awo esaki a bira realidad. D’Licious ta gradici Balashi, Chill, Grey Goose cu ta forma parti di e fiesta y e torneo. D’Licious ta invita tur hende pa yega Fiesta Nightclub dia 4 di October, pero tambe pa disfruta e weganan di softball. E teamnan lo ta tumando esaki na serio, unda cu tur lo ta buscando pa gana e premio.
Keda pendiente p’e ticketnan cu lo sali na prijs special y esaki ta danki na Chill. E lo ta 25 florin pa baila 2 banda, lo tin VIP booth. Probecha di e special cu lo sali y ta obtenibel na Citgo Boulevard y Citgo Esso Ville. Ta invita teamnan pa participa den e torneo.
