Gobierno a instrui WEB Aruba NV pa stop cu “hedging” y nan a cumpli cu e ordo, pero desde momento cu esey a sosode, prijs internacional di crudo ta subiendo so! Expertonan ta teme cu despues di Juli 2018, cu WEB Aruba NV lo mester ahusta su tarifanan atrobe, cu tur consecuencia cu esey lo tin pa nos comunidad. E paro riba “hedging” como tal ta resulta awor den un mal decision di Gobierno, aunke mester aclaria si cu WEB a desconseha Gobierno pero a opta pa par’e toch. Cu cuanto e tarifanan lo aumenta no por  bisa ainda, pasobra mester sigui e desaroyonan di aumento di prijs di crudo di cerca den e simannan nos dilanti.

Desde cu e partidonan MEP-POR-RED a tuma mando di Gobierno over, mesora a cuminsa e proceso pa para e formula di sigura prijs di crudo internacional cu WEB Aruba NV a hiba pa e ultimo decada. Despues di Pasco y net prome cu aña nobo, Utilities Aruba NV tabata bou presion pa tuma un decision urgente pa sigui cu “hedging” for di 1 di januari 2018 pa 31 di maart 2018. Mester menciona cu Prome Minister Evelyn Wever-Croes a duna su aprobacion pa esey y como tal pueblo no a sinti diferencia den prijs. Pero ora cu e seguro ey a caba na fin di maart, a bin instruccion pa no sigui mas.

Desde dia cu a stop cu e seguro internacional aki, prijs di crudo tabata na US$60 pa bari y awor prijsnan a subi te surpasa US$78 pa bari. Expertonan ta pronostica cu e tendencia ey lo continua, specialmente dor di e problemanan entre Merca y Iran. Tur esaki sin conta e retonan cu Venezuela ta pasando dor di dje cu lo por afecta e prijs mas ainda. Pero, tur esaki ta pronostico, pasobra lo por tin otro desaroyonan cu por reduci e tarifanan tambe.

WEB Aruba NV a menciona cu internamente nan ta haciendo tur posibel pa reduci nan gastonan di operacion, wanta cu proyectonan pa otro aña y revisa nan inversionnan. Tur esey pa por “wanta e sla” di e aumento di crudo mas cu nan por internamente. Pero, ta conoci cu si e prijsnan sigui aumenta, cu ningun compania lo por absorba e perdida y lo pase pa clientenan tardi of trempan.

Den e proceso, WEB Aruba NV tabata cumpra “Heavy Fuel Oil” for di CITGO como parti di e deal cu Gobierno di Aruba. A opta pa sali for di e contract aki y ta cumpra awor di un proveedor nobo. Na fin di april ultimo a cumpra e prome cargacion di e producto y a haya un tarifa di M-2 cu ta nifica e prijs di dos luna prome, pues di februari. Esey a cumbini WEB Aruba NV masha. Pero si nos cumpra na luna di juli proximo, nos lo mester paga M-1 pues e prijs di un luna prome cu lo ta juni. Y mirando e aumento cu tabatin y cu ta pronostica cu lo tin, e ora den juli pa augustus lo mester adapta tarifanan urgente, sino WEB lo cuminsa core den cifranan color cora.

Comments

comments