No ta mucho dia pasa, pa ser exacto, dia 21 di Februari, cu vocero di Departamento di Impuesto (DIMP), Meverly Romano, a anuncia cu no mag di para riba e caminda cu ta core dilanti di e entrada di e edificio.
Pero ta manera manda a manda e chauffeurnan y mirando cu e dia ta cerca pa ta e deadline pa paga e belasting riba vehiculo di motor, nan a haci menos caso di e peticion y toch a para nan auto dilanti di entrada di e edificio.
Tin un bon borchi cu ta indica bon cla cu no mag di para auto na ningun momento riba e caminda ey.
Pero e automobilistanan ta staciona nan auto na rand di e caminda, di forma cu nan ta obstaculisa e fluho di trafico ey dilanti.
Esey cada biaha ta un situacion fastioso pasobra una bes cu tin auto staciona na e rand di e caminda, bo ta haya cu e ora eynan dos auto no por pasa mas banda di otro.
En realidad e caminda ey ta un caminda di dos via, unda cu e tin cu keda liber pa trafico di tur dos direccion por trafica sin problema. Pero esaki semper tabata algo fastioso pasobra no por a prohibi ningun automobilista pa no staciona nan auto eynan, debi cu no tabata tin ningun borchi di trafico cu ta indica cu ta prohibi pa staciona auto eynan.
A bin un situacion cu ambulance a wordo stroba pa haci su trabao, mirando cu un di e clientenan di DIMP a bira malo, pero nan no por a haya acceso na e entrada.
Ta pidi pa e bishitantenan pa tene cuenta cu esaki, cu e caminda cu ta pasa dilanti di e edificio di Camacuri, mester keda na tur momento liber. Ta algo hopi importante pa siguridad.
Si acaso cu tin cualkier situacion di emergencia cu sea ambulance mester yega of polis mester yega rapido, no tin ningun obstaculo riba e caminda ey. Pesey tambe ta pidi bishitantenan pa tene cuenta cu esaki, cu e caminda awor aki a bira oficialmente cu no mag di para mes riba dje. Trafico tin cu sigui constante di tur dos direccion y automaticamente ta indica tambe cu no mag di staciona auto na rand di e caminda ey.
Y no lubida, tin un parkinglot caminda cu por staciona e autonan manera cu mester ta. E pasada aki mester keda liber.
