Tin un grupo di chauffeur di autobus, ta sumamente disgusta pa e desaroyonan cu tin ta andando. Di parti di gobierno, nan no ta hayando atencion. Nan tin hopi problema financiero pa nan por logra yega nan bus y nan kier un solucion.

Lisette Winklaar, vocero di e grupo aki. E tabata hunto cu su coleganan cu ta core e ruta di San Nicolas. E ta conta cu nan tin basta luna ta sintando cu minister di transporte y te ainda nan no por haya contesta riba cierto puntonan cu nan a trece dilanti.

Por ehempel nummerplaat. Pago di nummerplaat ta casi yega atrobe y no tin un contesta riba esey. Nan ta pagando 960, algun di nan ta paga 1840 y otro ta paga 640, cual no ta un liña igual pa tur.

Segun un colega di dje, Luzaira House, chauffeur di B-20, un biaha nan a bay dilanti di Parlamento. Minister a pidi pa nan pone nan preocupacion riba papel y a hiba esaki BID. A haya un reunion cu e minister di transporte y a sinta pa splica tur punto cu nan a manda p’e den e carta. E minister a bin pidi pa por dun’e tempo pa e por traha riba dj’e.

A sinta diferente reunion cu e minister y tur e reunionnan cu a sinta tabata pa warda, duna tempo, warda y duna mas tempo ainda. For di februari te cu awo, e chauffeurnan no a haya ni un contesta riba ningun punto cu nan a duna e mandatario.

House ta sigui splica cu nan tin otro coleganan di otro ruta, ta drenta den nan ruta. Nan tin hopi chauffeur caba den San Nicolas. A pidi atencion riba esaki y ni esey nan no a wordo duna. A pidi pa un baño, di cual nan a haci fiesta riba dje, sinembargo te cu awe, ni esey e chauffeurnan no por haci uzo di dje y no sa pa ki motibo. E baño ta paden di Carnival Village, y nan no ta habri’e pa e chauffeurnan di autobus. A priminti e chauffeurnan cu lo fix esaki, pero ainda nan ta wardando riba esaki.

Situacion preocupante

Lisette Winklaar a comenta di un otro problema grandi cu nan tin. Ta busnan di otro ruta cu ta piki den nan ruta bin abao y esey ta sosode tur dia. A acerca nan pa bisa nan pa pak e busnan aki aan, pero nada no ta wordo haci. A tuma e decision cu nan tambe ta hiba nan hendenan for di San Nicolas te hotel, cual a bira un fanfaria. Si no por pak tende 4 bus, no por atende cu tur e resto di busnan.

DTP

Pa loke ta DTP, nan no por haci nada, pasobra nan falta personal, dus nan no ta traha manera mester ta. Nan ploeg ta hopi tiki. Si loke nan tin cu soporta ta insulto di e busnan di hotel. E chauffeurnan ta sigui cu e accion aki te ora cu yega na un solucion.

Winklaar a menciona cu dos siman pasa nan tabata tin contacto cu Theo Kock di DTP. El a bisa cu nan ta bay traha riba e situacion y lo haya un contesta diamars siman pasa. Kock a menciona cu no por a papia cu e minister, pa lag’e pa diabierna. Cual no a sosode tampoco. Awo e chauffeurnan di autobus no por duna tempo mas. Nan ta keda riba nan accion, sigui core e ruta, te ora actua contra esnan cu ta haci esey cu nan.

E chauffeurnan di autobus ta pidi pa nan wak un solo punto, pero nan no ta haci ni esaki. Ley pa un ley pa tur. Mester cuminsa pak aan esnan cu ta molestia e chauffeurnan p’ariba, despues bin atende cu nan.

Practicamente ki ora cu e chauffeurnan a bay den reunion, nan ta bay na beneficio pa tur.

E rutanan

E ruta cu nan ta core ta di San Nicolas te Riu y nan ta cumpli cu ley. Antes e chauffeurnan di bus Noord nunca a core hotel, segun Sonia Vrolijk, un otro chauffeur di autobus. Chauffeurnan di San Nicolas tabata baha cliente pa Playa y Hotel. Nan tabata caba nan ruta. Despues di bin, nan ta subi bek. Kico a pasa cu Noord, nan a bin dañ’e. Esunnan di San Nicolas, ta subi y caba. Esunnan di Noord kier traha placa facil. San Nicolas tabata core perfectamente manera ley ta bisa. Si e cliente su ruta no caba, cu pago extra ta bay te unda e mester bay. Despues ora cu a sinti e dushi di e bolo, nan a laga Noord tira. P’esey pirata a start y bin contra di esnan di San Nicolas. Esnan di San Nicolas ta duna servicio. E chauffeurnan di bus di San Nicolas tin diferente ora. Nan tin esnan cu ta cuminsa di marduga. Otronan ta cuminsa pa 8’or of 9’or. Nan ta parti durante henter dia. Esunnan di Noord kier core anochi y stroba esnan cu ta duna servicio y esey no ta husto, segun Vrolijk. Manera cos ta bay, ta obliga e chauffeurnan di San Nicolas, traha 12 pa 14 ora, laga famia kibra.

Sla a cay: Confrontacion entre chauffeurnan di autobus Click link pa mas https://24ora.news/2KCo7Tq

Posted by 24ora on Wednesday, November 20, 2019

Awo chauffeurnan di Noord ta hasta bin den nan ruta. Nan ta 68 bus di San Nicolas pa Playa. Nan ta esun di mas hopi, pero nan tin’e dividi durante dia.

Loke e chauffeurnan di bus kier, pa gobierno contesta riba e puntonan cu a duna nan, cual nan mes a pidi nan pa pone preto riba blanco, cual e chauffeurnan a haci. Nan a haci di nan parti y awo ta pidi pa gobierno haci su parti. Si kiera contesta nan un di e puntonan preto riba blanco, mescos cu nan a haci’e.

Comments

comments