Chauffeurnan burachi deteni despues di parada di Blaas

1759

Polisnan riba motorcycle a controla automobilistanan y motociclistanan bayendo abou despues di parada di Blaas na San Nicolas. No obstante e tantisimo advertencia pa sigura cu chauffeurnan no ta bou influencia di alcohol, asina mes algun persona ta purba nan suerte, pensando cu por burla di autoridadnan. Por lo menos tres di nan no tabatin suerte e biaha aki y a keda deteni na altura di rotonde di Pos Chikito.

Durante control di Polis, a laga e chauffeurnan supla y den nan rosea a deduci cu e nivel di alcohol tabata mas halto di locual ta permiti pa ley. A detene nan na e sitio y cu Dog Catcher a transporta nan pa Warda di Polis na Santa Cruz pa presenta dilanti Fisca Auxiliar pa dicidi si ta keda encarcela of por bay cas cu un multa.

Ta adverti automobilistanan y motorciclistanan riba e risico di maneha un vehiculo di motor bou influencia di alcohol, cu esaki por tin consecuencia. No solamente pa e detencion, pero dependiendo con hopi alcohol tin den bo rosea, e por encera cu Bo ta perde bo rijbewijs pa un tempo of kisas hasta pa semper.

Tuma e advertencia na serio, percura semper pa tin un persona cu no ta bebe alcohol, pa stuur despues di eventonan di carnaval y na tur otro evento. Asina tur hende ta sigur cu ta yega cas sano y salvo.