E chauffeur di inicial S.M. naci na Aruba di 28 aña di edad, biba na Savaneta, tabata e chauffeur di e auto marca Hyundai, modelo Accent, cu number A-4690, color blanco, cu a alcansa e peaton ayera nochi na Pos Chikito. Consecuentemente e homber Luis Carlos Neblies naci dia 30 di Juli 1964 na Colombia, a fayece na e sitio debi na e sla nan ricibi.
Ey a test e chauffeur pa alcohol, pero a resulta cu e tabatin 0% di alcohol den su curpa. E tabata hopi nervioso y spanta despues di e accidente. Mas laat Polis a bay buske, a detene y mainta a interoge. Den oranan laat di mainta el a sali bek. Segun nos informacion, e hoben aki NO tin rijbewijs, loke ta haci e asunto masha complica.
Husticia awor ta sospech’e di e delito “dood door schuld”, di a participa di forma ilegal den trafico pasobra e no tin rijbewijs. Fiscal a duna ordo pa check su celular pa verifica si e tabata na telefon ora di e accidente, sea ta papiando of den chat. Tambe ta investigando con e accidente a sosode exactamente.
