Diadomingo, pa mas of menos 4:45 am, a tuma luga un accidente net dilant’i Fantastic Gardens na Bushiri.
Ta trata aki di un Nissan March colo shinishi, numera A-61030, cu tabata bin di Bushiri, bayendo direccion Pos Abao, ora cu dado momento el a perde control y a ranca un pal’i luz lagando e bario sin coriente.
Na e momento ey un Toyota Yaris colo blanco, numera A-46421 tabata biniendo, no a mira cu e pal’i luz tabata kibra y benta riba caminda. El a dal na dje, kedando sin su bumper.
Por a nota na e sitio cu e chauffeur di e March a core benta boter di alcohol afo y a cuminsa cana bay prome cu e polis a yega, lagando asina e auto atras. Tambe por a nota cu el a kita e plach’i number pa asina polis no haya ningun dato.
Sinembargo no a dura mucho cu polis a bin topa cu e tipo y a trece bek n’e sitio. A bay over despues pa detene. Tabata bisto cu e persona aki tabata bastante bebi. A hib’e warda pa asina e sosega su curpa.
Mientrastanto personal di Elmar a presenta pa asina haci e trabaonan necesario pa pone un pal’i luz nobo y pa asina e bario haya coriente bek.