Tabata algun minuut prome cu 8:00pm cu Polis a para un pick-up color cora dilanti di Serlimar na Pos Chikito. For di basta rato caba nan tin bista riba dje, pa motibo cu e ta core hopi malo y duro riba caminda. A logra par’e na Pos Chikito. Polis a puntr’e si e ta consciente cu ta core malo y duro riba caminda, el a contesta e agente: “Bo ta strobami, mi ta bayendo na mi di dos novia”. Polis a bise: “Bo ta core malo y duro y kier tira contrabanda tambe”.
E homber a tum’e den un manera masha pret, pero full su pret a termina na momento cu Polis di trafico a presenta cu mashin di test pa alcohol. E chauffeur tabata “sterk onder invloed’. El a supla cinco biaha mas cu e limite.
Polis a bis’e cu e limite ta 220 ug/l, pues e homber a supla riba 1000 ug/l. Cu e resultado aki ta duna Polis e autoridad di kita su rijbewijs for di dje y Ministerio Publico lo dicici kico ta bay para cun’e, si e ta hay’e bek dentro di 10 dia of no.
Ley ta stipula cu na momento cu Bo supla y haya mas cu 220 uitgeademd lucht ug/l den bo rosea, ta considera Bo burachi. Esey ta e limite. Tin biaha sa topa chauffeurnan cu apenas a pasa e limite, cu Polis por “kijk door de vingers” y laga un otro hende stuur pa Boso yega cas sigur. Pero, asina cu surpasa e nivel di 570 ug/l Bo ta den problema. Na e nivel ey ley ta duna Polis derecho pa kita Bo rijbewijs! Den casonan asina ta keda na Fiscal di Ministerio Publico pa dicidi si ta duna Bo e bek den 10 dia of si ta kit’e te ora Bo caso yega dilanti Hues. Eynan e decision no ta mas den man di Ministerio Publico sino den man di Corte.
Na final a transport’e pa Warda di Polis, e di dos novia a keda ward’e sin fin.
