Awe merdia, algo pasa di 12:30pm a pidi presencia di Polis na Sero Blanco, cerca di cas di Minister Presidente mr. Evelyn Wever-Croes, pa un accidente di auto. Na yegada di e prome unidad di Polis, a topa cu un auto kibra, marca Toyota modelo Corolla, numera A-42454, cu obviamente a dal den un palo di luz, den un caya smal asina. E chauffeur no tabata na e sitio mas.
Bisiñanan a bisa Polis cu nan a mira un hende muhe baha for di e auto cu un boter di biña “Night Rain” den su man y a cana bay. A start un buskeda y den un otro caya, na altua di Joy Supermarket, a bin topa cu e señora, un conoci di Polis, cu no a aprecia presencia di autoridad y pio cu a bin pa detene. El a resisti su detencion, pero asina mes a logra domin’e, boei’e y hink’e den auto di Polis pa hib’e Warda di Polis pa interogacion.
Investigacion preliminar na e sitio mes a saca afor cu e auto ta horta, pues cu e auto no ta pertenece na e chauffeur y e no por a splica ki mish’e cu e auto tampoco. Awor lo mester saca afo ken ta doño di e auto, unda nan a hort’e, etc. Esaki por hinca e chauffeur den mas problema ainda, pasobra no solamente pa stuur auto burachi, sino tambe pa horta un auto di otro hende. Riba dje ta bin ainda e daño haci na e auto y na e palo di luz di NV Elmar.
