Chauffeur burachi a atropeya peaton na Ponton

1275

Diadomingo pa 9:10pm a sosode un accidente serio na altura di e crusada di Topcar na Ponton. Un auto marca KIA modelo Rio color berde, cu number A-40338 a atropeya un peaton, Sandro Sanchez (54) sin adres fiho, na momento cu e tabata crusando. 

E chauffeur a bisa Polis cu e no a mire mes, el a djis sinti un sla y despues den spiel a mira e peaton benta riba caya. Por a mira cu tin un sla grandi na e windshield di e auto, indicando cu e peaton a pasa full riba e hood di auto, prome cu a cay. E tabata crusando caminda cu un garoshi di supermercado, cu a bay dal den e auto biniendo for di direccion contrario. 

Como consecuencia di e accidente, a nota cu e peaton tabatin un pia fractura mientras cu e tabata sangra hopi na su cabes. Ambulance a presenta na e sitio y Paramediconan a brinda asistencia riba caya caba, despues den ambulance, a stabilisa e pashent y despues transport’e pa Hospital pa tratamento medico mas avansa. 

Polis di Trafico a tuma e investigacion over y a laga test chauffeur di e auto KIA Rio si e por tabata bou influencia di alcohol. E test a sali malo pa e chauffeur, aunke e no tabata mustra di tabata hopi burachi. A detene y hib’e Warda di Polis pa haci un test mas exacto di e nivel di alcohol den su rosea y pa mira kico e Fiscal Auxiliar lo dicidi, como cu el a atropeya un peaton siendo bebi. 

Departamento Forensico di Polis a presenta na e sitio pa conduci un investigacion riguroso, mirando e seriedad di e desgracia. E caminda a keda cera pa casi 2 ora.