Diamars den careda di 10:24PM a sosode un accident riba e caminda di Catiri. E truck di Piece of Cake tabata bayendo direccion Noord y dado momento un Suzuki color blauw numera A-51871 tabata biniendo for di Moko cu direccion pa Tanki Leendert.
E chauffeur femenino no a paga tino cu e truck tabata biniendo.Consecuentemente el a bay dal contra e truck y a laga daño material na tanto e taira di e truck como su mesun auto.
E señora kier a purba bandona sitio, pero no a logra pa motibo cu taira y riem di su auto a keda completamente daña. Personanan na e sitio a wanta e señora te ora polis a yega. Polis a yega rapidamente na sitio y di biaha a cuminsa haci investigacion di kico tur a pasa.
Despues di a scucha e chauffeur masculino di e truck, a bay na e chauffeur femenino, kende a cuminsa halsa cu e agentenan policial. Di biaha a deten’e door di sospecha cu e tabata bou di influencia di algun of otro substancia. Na momento cu e transporte policial a yega na e sitio, a pone den dje pa transport’e warda di polis. Polis di trafico tambe a presenta na e sitio pa tuma datonan di e sucedido.
