Chauffeur a perde control drenta mondi

5

Algo prome cu 6’or di atardi a drenta e informe cu tin un accidente cu hende pega den auto, na altura di ex Drive In. Patruya, Materialenwagen y Ambulance a wordo manda na e sitio.
Na yegada a constata un SUV pega den mondi cu dos persona den dje.

E hendenan mes no tabata pega den e vehiculo, pero ta dificil pa personal di Ambulance yega pa habri e vehiculo y sacanan. A cuminsa corta e matanan rond y asina a logra saca prome e pasahero y despues di un rato e chauffeur. E dos damanan aki a pasa den un susto grandi y tabata mustra hopi spanta.

Segun un chauffeur cu tabata nan tras, a bisa cu e auto tabata bay duro y net den e bocht a perde control ora cu a brake y a draai un rond djei drenta mondi.
Na e sitio tabatin dos materialenwagen pero solamente un patruya, cu a haci cu e trafico a pega, door cu e vehiculo di Bombero tabata para me-mey di caminda.