Tin pais ta habri aña tirando un kabes den laman riba e promé dia di aña. Kòrsou tradishonalmente ta hasi esaki armando un bon fiesta manera tin tur aña na e asina yama Fuikdag. Tur aña hopi habitante i turista ta bini huntu na Fuik den nan boto pa asina selebrá e komienso di aña huntu. Lamentablemente un fiesta di e magnitut akí tin un impakto grandi riba nos medio ambiente. Na final di e fiesta por a konstatá hopi sushi ta drif den laman.
Pa e motibu aki CHATA su dive task force den kolaborashon ku 84 boluntario sostené pa diferente spònser lokal a disidí di organisá un akshon di limpiesa na Fuik pa limpia e aria (tantu riba tera komo den awa) i ala bes krea mas konsientisashon tokante e importansia pa tene nos medio ambiente limpi.
E evento asina yamá “after Fuiking it all up” a tuma lugá dia 12 di yanüari último. Na e evento akí boluntarionan a rekoudá mas ku 1000 KG di sushi for di laman i tera na Fuik. E sushi tabata konsistí di plèstik di un solo uso, bòter di glas, bleki di aluminio, bala di plèstik, i diferente otro artíkulo i a keda poné den kònteinernan di sushi di “Defensie Caribisch Gebied”.
Polushon di plèstik ta afektá nos oséano rònt mundu. Tin rapòrt ta pronostiká ku pa 2050 lo bai tin mas plèstik den nos oséano ku piska. Komo konsekuensia di esaki, animalnan manera piská, para i turtuga, por konfundí plèstik pa kuminda, i keda pegá den esaki, stek, i komo konsekuensia muri. Ala bes sushi den nos laman tin un impakto enorme riba nos ref ku di su banda tin un impakto riba turismo, industria di peska, nos kalidat di awa i resistensia di nos kosta kontra tormenta. Pero e bon notisia ta ku ainda nos ta na tempu pa tuma akshon i salba nos medio ambiente.
“Segun CEO di CHATA, Miles Mercera, “Nos isla su bida supaquatiko ta un di e bários kosnan ku ta diferensiá nos isla for di otronan den Karibe. Pues ta di sumo importansia pa nos traha huntu komo un komunidat sostenibel pa konservá nos oséano. E kompromiso di e Dive Task Force pa organisá e akshon di limpiesa di sushi den laman ta netamente e promé paso pa sostenibilidat i konsientisashon riba nos isla su bida aquatiko. Mi ta kere firmemente ku asistensia di komunidat kompletu i trahando huntu nos por hasi e inisiativa aki aún mas grandi, krea kambio sostenibel i sigurá e siguiente generashon un bida marítimo ekológiko mas saludabel.”
Ban trese kambio den 2019! Manera sr. Eugene Rhuggenaath, Minister Presidente di Kòrsou ta bisa: “Tene Kòrsou limpi ta un responsabilidat konhunto.”
Miembronan di CHATA Dive Task Force:
Curious2Dive, Jan Thiel Diving, ScubaDo Dive Center, Ocean Encounters Diving, The Dive Bus, Epsilon, Atlantis Diving, Scuba Lodge Dive Center Pietermaai, Goby Divers, Blue Bay Dive and Watersports, Central Dive, Coral Divers, B Diving and Watersports, Bahia Diving, and GO WEST Diving.
