Hunto cu Asociacion di Parkinson Aruba, dr. Horacio E. Oduber Hospital ta organisa un actividad di informacion tocante e tema “Malesa di Parkinson“ dia 15 di November pa 6:30pm. Tur pashent di Parkinson of cu tin famia cu Parkinson y tur esnan cu ta interesa tocante e tema aki, por pasa riba e dia aki, na MFA Santa Cruz, net banda di e oficina di rijbewijs di Polis na Santa Cruz.
Dr. Roberto Weiser, neurologo trahando na Hospital, a splica cu nan ta bay tene un reunion hopi bunita, hopi entretenido. Lo splica kico e malesa di Parkinson ta. Lo bay haci manera un tipo di update tocante di e tema, e diagnostico y tratamento. Lo papia tur cos y por contesta hopi pregunta cu esnan presente lo por tin riba e tema eynan.
Kico ta Parkinson
Ora cu tende di e malesa di Parkinson, ta manera un tipo di temblamento. Segun dr. Weiser, malesa di Parkinson ta un malesa neurologico y ta den e clasificacion di un malesa neurodegenerativo, cu ta nifica cu algun cel di e celebro ta muri poco poco cu tempo.
E prome malesa neurodegenerativo cu ta existi, esun di mas frecuente ta e malesa di Alzheimer. Na di dos luga, por haya e malesa di Parkinson.
Parkinson ta sosode pasobra na un momento determina, algun cel productor di un neurotransmisor, Dopamina, ta muri.
Dicon nan ta muri
Ningun hende te ainda sa esaki. E ta bao di investigacion dicon e celnan ey ta muri. Pero e ta pasa cu tempo, e celnan cu ta muri, no por produci mas un neurotransmisor cu yama Dopamina, manera ya menciona.
Dopamina, den e celebro ta manera gasolin pa un auto. Si un celebro no tin dopamina, algun cu yama e sistema motorico den e celebro, cu ta move nos musculo, no por funciona bon. Ta pa e motibo ey mes, ora un hende tin 80% of mas cu celnan cu ta produci Dopamina, nan ta muri, e ora sintomanan ta aparece.
E sintomanan
E no ta solamente temblamento, e sintoma mas importante ta rigidez, spiernan stijf y tambe lentitud of movementonan lento. Ta pa e motibo ey, e persona cu tin Parkinson ta cana hopi poco poco. Nan no tin expresion facial, su cara ta manera stijf. Nan ta move poco, nan no tin balans di nan brasa. Nan ta cana manera e curpa dobla padilanti. Pesey nan tin hopi problema motorico.
Temblamento tambe ta un sintoma di Parkinson. Por ta algun pashent por tin mas temblamento cu otro pashent. Otro grupo di pashent, por tin mas rigidez. Otro grupo di pashent por tin mas movementonan lento, of tambe bradikinesia.
Pa determina Parkinson, dokter mester haci un diagnostico y e diagnostico semper ta uno clinico. Ta nifica cu no ta existi un test cu por bisabo cu si bo tin Parkinson. Bo por haci MRI, bo por haci CT Scan, bo por haci un EEG, bo por haci un lumbar puncture y tur cos por sali normal.
Esaki ta pa descarta enfermedadnan diferente compara cu Parkinson. Ta haci un diagnostico na momento cu e pashent tin tur tres sintoma; Temblamento, rigidez y movecion lento. Asina cu e diagnostico ta haci, e ora por splica e pashent cu e tin Parkinson y mester di cuminsa tratamento.
